نسخهِٔ نادرهِٔ زمان اولان استاديمز، غايت شجيع و متين و اولو العزمانه بر جسارتِ فوق العاده‌يه مالك بر لسان الحقدر كه، حق يولنده سوز سويله‌مكدن چكينمز و لَوْمِ لائمدن قورقمازلر. بر گون "بسم اللّٰه" يازيلى قبر طاشلرينى لغملر اوزرينه قونوركن گورورلر. اوراده دنياجه مهمّ ذاتلر حاضر اولدقلرى حالده، كيمسه‌نڭ سويله‌يه‌مديگى غايت آجى سوزلرله او حقسز ايشه و داها باشقه حقسز ايشلره ده سدِّ سديد اولمشلردر.

هم مملكتمزده هر كيم استاديمزى رنجيده ايتمگه جسارت ايتمشسه، رسالهِٔ نوره ضرر گتيرمشسه، مطلقا سوءِ عاقبته اوغرامشلردر. بعضلرى دخالت ايدوب عقللرى باشلرينه گلمش ايسه ده، بعضلرى ده جزالرينى چكمشلردر. بو وقعه‌لرڭ بعضلرى، لاحقه‌ده يازيلمشدر.

الحاصل مبارك استاديمزڭ أوصافِ كمالنى و محاسنِ أحوالنى بزم گبى عاجزلرڭ بِحقّ تصوير و تعريف ايده‌بيلمسنه إمكان يوقدر. خالقِ ذو الجلال والجمال حضرتلرى، استاديمزى بر وجودِ مستثنا اولارق ياراتمش و توفيقِ إلٰهيه‌سنه مظهر قيلمشدر. نه سعادت اوڭا كه· اونڭ بِالذّات إشتغال ايتديگى و أهمّيتله تشويق و توصيه ايتديگى رسالهٔ نور ايله خدمتِ قرآنيه و ايمانيه‌ده بولونه و رسالهٔ نوردن درسنى آلمش اوله...