هم اويله بر طرزده عزّتِ علميه‌يى حياتده محافظه ايتمش كه· أصلا كيمسه‌يه عرضِ إفتقار ايتمه‌مك، حياتنڭ أڭ مهمّ بر دستورى اولمشدر. دنيا كنديلرينه توجّه ايتمشسه ده، اوندن يوز چويرمش اولان استاديمز· أمرِ معاشده جنابِ حقّڭ عنايتيله، عفّت و نزاهتنى دائما محافظه ايدر· صدقه، زكات و هديه‌لرى آلماز. يقينًا بيلييورز كه· قسطمونيده بولوندقلرى زمان، اوطوردقلرى أوڭ ايجارينى ويرمك ايچون يورغاننى صاتديلر ده، ينه هيچ بر صورتله هديه قبول ايتمديلر.

هم استاديمز، تكلّف و تعظّمدن أصلا خوشلانماز و طلبه‌لرينڭ دخى تكلّف قيدندن آزاده اولمالرينى أمر ايدر. و بيوررلر كه: "تكلّف، شرعًا و حكمةً فنادر· چونكه تكلّف سوداسى، إنسانى حدِّ معروفى تجاوزه سَوق ايدر. متكلِّف اولانلر، بعضًا خودبينانه بر تظاهر و تفاخر طورى و موقّت صوغوق بر رياكار وضعيتى طاقينمقدن قورتولماز. حالبوكه بونلرڭ ايكيسى ده إخلاصى زده‌لر."

هم استاديمز، غايت متواضعدر. تفوّق و تميّز داعيه‌لرندن، شهرت سودالرندن زياده‌سيله صاقينيرلر. كنديلرينه مخصوص صافى مشربى، او گبى جان صيقاجق شيلردن عاليدر. هركسه، هله إختيارلره و چوجقلره و فقرالره، رفق و ملايمتله اخوّتكارانه بر معاملهِٔ خالصانه‌ده بولونورلر. مبارك يوزلرنده، مهابت و بشاشتله قاريشق بر نورِ وقار لمعان ايدر. هيبتله برابر آثارِ اُنس و الفت دخى گورونور. دائما متبسّم بولونورلر. فقط بعضًا تجلّياتڭ مقتضاسى اولارق مهابت و جلال نظرى او درجه تظاهر ايدر كه، آرتيق او زمان ياننده بولونوب ده سوز سويله‌مك ايسته‌ين آدمڭ، عادتا ديلى طوتولور، نه سويله‌مك ايستديگى آڭلاشيلماز. بو عاجزلر، چوق دفعه بو حالى مشاهده ايتدك.