أزجمله: حياتِ إجتماعيه‌يى إداره ايدن أڭ مهمّ أساس اولان حرمت و مرحمت غايت صارصيلمش. بعض يرلرده غايت أليم و بيچاره إختيارلر، پدر و والده‌لر حقّنده دهشتلى نتيجه‌لر ويرييور. جنابِ حقّه شكر كه· رسالهِٔ نور بو مدهش تخريباته قارشى، گيرديگى يرلرده مقاومت ايدييور، تعمير ايدييور.

سدِّ ذو القرنيْنڭ تخريبيله، يأجوج و مأجوجلرڭ دنيايى فساده ويرمه‌سى گبى· شريعتِ محمّديه (عصم) اولان سدِّ قرآنڭ تزلزليله يأجوج و مأجوجدن داها مدهش اولان أخلاقده و حياتده ظلمتلى بر آنارشيلك و ظلملى بر دينسزلك فساده و إفساده باشلايور.

رسالهٔ نور شاكردلرينڭ، بويله بر حادثه‌ده معنوى مجاهده‌لرى، إن شاء اللّٰه زمانِ صحابه‌ده‌كى گبى آز عمل ايله، پك بيوك ثواب و أعمالِ صالحه‌يه مدار اولور.

عزيز قارداشلرم! ايشته بويله بر زمانده، بو دهشتلى حادثاته قارشى، إخلاص قوّتندن صوڭره بزم أڭ بيوك قوّتمز· إشتراكِ أعمالِ اُخرويه دستوريله قلملرله، هر برى ديگرينڭ أعمالِ صالحه دفترينه حسنات يازدقلرى گبى، لسانلريله هر برينڭ تقوا قلعه‌سنه و سپرينه قوّت و إمداد گوندرمكدر. و بِالخاصّه فورطنه‌لى تهاجمه هدف اولان بو عاجز قارداشڭزه، بو مبارك شهورِ ثلاثه‌ده و أيّامِ مشهوره‌ده يارديمنه قوشمق، سزڭ گبى قهرمان و وفادار و شفقتكارلرڭ شأنيدر. بتون روحمله بو إمدادِ معنوىيى سزدن رجا ايدييورم. و بن دخى، ايمان و صداقت شرطيله، رسالهٔ نور طلبه‌لرينى بتون دعالريمه و معنوى قزانجلريمه، يگرمى درت ساعتده، إشتراكِ أعمالِ اُخرويه دستوريله، بعضًا يوز دفعه‌دن زياده رسالهٔ نور طلبه‌لرى عنوانيله حصّه‌دار ايدييورم.