او مصيبتِ سماويه‌دن، ظالم قسمنڭ جنايتنڭ نتيجه‌سى اولارق گلن فلاكتدن وفات ايدن و پريشان اولانلر أگر اون بش ياشنه قدر اولانلر ايسه، نه دينده اولورسه اولسون شهيد حكمنده‌در. مسلمانلر گبى بيوك مكافاتِ معنويه‌لرى، او مصيبتى هيچه اينديرر.

اون بشدن يوقارى اولانلر، أگر معصوم و مظلوم ايسه، مكافاتى بيوكدر· بلكه اونى جهنّمدن قورتارير. چونكه آخر زمانده مادام فترت درجه‌سنده دين و دينِ محمّدى عليه الصلاة والسلامه بر لاقيدلق پرده‌سى گلمش و مادام آخر زمانده حضرتِ عيسىنڭ (عس) دينِ حقيقيسى حكم ايده‌جك، إسلاميتله اوموز اوموزه گله‌جك. ألبته شيمدى، فترت گبى قراڭلقده قالان حضرتِ عيسىيه منسوب خرستيانلرڭ مظلوملرينڭ چكدكلرى فلاكت، اونلر حقّنده بر نوع شهادتدر دينيله‌بيلير. خصوصًا إختيارلر و مصيبتزده‌لر، فقير و ضعيفلر، مستبد بيوك ظالملرڭ جبر و شدّتلرى آلتنده مصيبت چكييورلر. ألبته او مصيبت، اونلر حقّنده مدنيتڭ سفاهتندن و كفرانندن و فلسفه‌نڭ ضلالتندن و كفرندن گلن گناهلره كفّارت اولمقله برابر، يوز درجه اونلره كاردر دييه حقيقتدن خبر آلدم. جنابِ أرحم الرّاحمينه حدسز شكر ايتدم. و او أليم ألمدن و شفقتدن تسلّى بولدم.

أگر او فلاكتى گورن ظالملر ايسه و بشرڭ پريشانيتنى إحضار ايدن غدّارلر و كندى منفعتى ايچون إنسان عالمنه آتش ويرن خودكام، آلچاق إنسى شيطانلر ايسه، تام مستحق و تام عدالتِ ربّانيه‌در.

أگر او فلاكتى چكنلر، مظلوملرڭ إمدادينه قوشانلر و إستراحتِ بشريه ايچون و أساساتِ دينيه‌يى و مقدّساتِ سماويه‌يى و حقوقِ إنسانيه‌يى محافظه ايچون مجادله ايدنلر ايسه، ألبته او فداكارلغڭ معنوى و اُخروى نتيجه‌سى او قدر بيوكدر، او مصيبتى اونلر حقّنده مدارِ شرف ياپار، سَوْديرر.

سعيد النورسى

٭ ٭ ٭