أوت بيڭلر ليرا قيمتنده ألماسلرى چالابيلن ماهر بر خيرسز، اون غروشلق بر جام پارچه‌سنه خيرسزلق ايتمكله، ألماس چالمش گبى عين جزايه كندينى محكوم ايتمك· دنياده هيچ بر خيرسزڭ بلكه هيچ بر ذىشعورڭ كارى دگلدر. بويله بر خيرسز قورناز اولور، بويله نهايت درجه‌ده أبلهانه حركت ايتمز.

أى أفنديلر! هايدى وهمڭز گبى بن او خيرسز گبى اولدم. بن إسپارطه ناحيه‌لرندن پريشان بر كويده طوقوز سنه إنزواده بولونان و شيمدى بنمله برابر غايت خفيف بر جزايه محكوم اولان صافدل بش اون بيچاره‌لرڭ فكرلرينى حكومت عليهنه چويرمكله كندينى و غايهِٔ حياتى اولان رساله‌لرينى تهلكه‌يه آتمقدن ايسه، أسكى زمانده اولديغى گبى آنقره‌ده ويا إستانبولده بيوك بر مأموريتده اوطوروب بيڭلر آدمى تعقيب ايتديگم مقصده چويره‌بيليردم. او وقت بويله ذليلانه محكوميت دگل بلكه مسلگمه و خدمتمه مناسب بر عزّتله دنيايه قاريشه‌بيليردم.

أوت فخر و تمدّح نيّتيله دگل بلكه مجبوريت و محجوبيتله خودفروشانه أسكى بر قسم رياكارلغمى خاطرلاتمقله بنى أهمّيتسز، وجودندن إستفاده ايديلمز، عادى مرتبه‌يه سقوط ايتديرمك ايسته‌ينلرڭ ياڭليشلرينى گوسترمك ايچون ديرم: