إدّعانامه‌ده، متعدّد منطقه‌لر و رسالهٔ نورڭ نشر و تعميمنه آدملر واسطه‌سيله چاليشديغم بيان ايديلييور. جوابًا ديرم كه:

بن بر كويده، غربتده، كيمسه‌سز، حسنِ خطّم يوق ايكن· ترصّد آلتنده، هركس بنم معاونتمدن چكينيركن· يالڭز غايت محدود درت بش أحبابمه بر يادگار اولارق خاطراتِ ايمانيه‌يى گوندرديگمه "نشر و تعميمه چاليشييور" ديمك، نه قدر خلافِ حقيقت اولديغنى ألبته تقدير ايدرسڭز. بنم گبى حدّندن چوق فضله توجّهِ عامّه‌يه مظهر بر إنسانڭ، اون بش سنه وانده تدريس ايله مشغول اولديغم حالده، بر تك دوستمه بر ايكى ايمانى رساله‌لريمى گوندرمكله بوڭا ناصل نشريات دينيلير؟ بنم مطبعه‌م يوق، كاتبلرم يوق، حسنِ خطّم يوق، ألبته نشريات ياپامدم. ديمك رسالهِٔ نور جاذبه‌داردر، كندى كندينه إنتشار ايدييور. يالڭز بو قدر وار كه· "اوننجى سوز" نامنده حشره دائر اولان رساله‌يى، داها يڭى حرفلر چيقمه‌دن أوّل طبع ايتديردك. حكومتڭ بيوك مأمورلرينڭ و مبعوثلرينڭ و واليلرينڭ أللرينه گچدى، كيمسه إعتراض ايتمدى. اوندن، سكز يوز نسخه إنتشار ايتدى. اونڭ إنتشارى مناسبتيله، اونڭ گبى صِرف اُخروى و ايمانى بر قسم رساله‌لر، كندى كندينه بر قسم إنسانلرڭ ألنه گچدى. ألبته إختيارسز، كندى كندينه بو إنتشار بنم خوشمه گيتمش. بن ده بعض خصوصى مكتوبلرمده، بو تقديريمى تشويق طرزنده يازمشم. بو اوچ آيدر، بو قدر تحرّياتِ عميقه نتيجه‌سنده، قوجه بر مملكتده، اون بش يگرمى آدمڭ أللرنده كتابلريمى بولمشلر. بنم گبى اوتوز سنه تأليفات و تدريساتله عمرى گچن بر آدمڭ، يگرمى خصوصى دوستنده بعض خصوصى رساله‌لرى بولونماسى، نه صورتله نشريات اولور؟ او نشريات ايله ناصل بر هدفى تعقيب ايده‌بيلير دينيلير؟