بو بياناتمه، صدددن خارج تفصيلات نظريله باقمه‌مق گركدر. چونكه رسالهِٔ نورڭ يوزدن زياده رساله‌لرى بنم أوراقِ توقيفيه‌م حكمنه گچمش اولديغندن، هم هيئتِ حاكمه تدقيق ايله مكلّفدر، هم بن ايضاح و جواب ويرمگه، قرآنه و عالمِ إسلامه و إستقباله علاقه‌دارلغى جهتيله مجبورم. مادام بر مسئله‌نڭ تام تنوّرى، هر حالده اوزاق و ياقين بتون إحتماللرى بيان ايتمكله اولور. مسئله‌مزه عائد اوزاق بر إحتمالى بيان ايتمگه إحتياج وار. شويله كه:

أگر دينسزلگى و كفرى كندينه مسلك إتّخاذ ايدن بدبخت بر قسم آدملر، بر مقصدِ سياسينڭ پرده‌سى آلتنده حكومتڭ بعض أركاننه حلول ايدوب إغفال ايتسه‌لر ويا مأموريت مسلگنه گيرسه‌لر و رسالهِٔ نورى دسيسه‌لرله إمحا و بنى تهديدلريله صوصديرمق ايچون ديسه‌لر: "تعصّب زمانى گچدى. ماضىيى اونوتمق و إستقباله بتون قوّتمزله متوجّه اولمق لازم گليركن، سنڭ إرتجاعكارانه بر صورتده دينى و ايمانى قوّتلى درس ويرمڭ ايشمزه گلمز!"

الجواب:

أوّلا او ماضى ظن ايديلن زمان ايسه، إستقباله إنقلاب ايتمش و حقيقى إستقبال اودر و اورايه گيده‌جگز.

ثانيًا: رسالهِٔ نور تفسير اولديغى حيثيتيله، قرآنِ حكيم ايله باغلانمش. قرآن ايسه، كُرهِٔ أرضى عرشه باغلايان جاذبهِٔ عموميه گبى بر حقيقتِ جاذبه‌داردر. آسياده حكم ايدنلر، قرآنڭ رسالهِٔ نور گبى تفسيرلريله مبارزه ايده‌مزلر. بلكه مصالحه ايدرلر، اوندن إستفاده ايدرلر و حمايه ايدرلر.

امّا بنم صوصمام ايسه· مادام عادى بر كشف يولنده و أهمّيتسز بر فكرِ سياسى پشنده و دنيوى بر حيثيت يوزندن چوق أهلِ عزّتڭ باشلرى فدا ايديلسه· ألبته قوجه جنّتڭ فيآتى اولاجق بر ثروت و حياتِ أبديه‌يى قزانديره‌جق بر آبِ حيات و بتون فيلسوفلرى حيرتده بيراقه‌جق بر كشفيات يولنده، وجودم ذرّه‌لرى عددنجه باشلرم بولونسه و فدا ايديلمسى لازم گلسه، بِلا تردّد فدا ايديلير. هم بنى تهديد ويا إمحا صورتيله صوصديرمق، بر ديل يرينه بيڭ ديل قونوشديره‌جق. يگرمى سنه‌دن بَرى روحلره يرلشن رسالهِٔ نور· صوصمش بر ديلمه بدل، بيڭلر ديللرى سويلتديرمسنى رحيمِ ذو الجلالدن اميدوارم.

٭ ٭ ٭