سزلر قوجه إسپارطه دگل، بلكه بيوك بر مملكتى تنوير ايده‌جك ألكتريقلرڭ ماكينستلرى حكمنده‌سڭز. ماكينه‌نڭ چرخلرى بربرينه معاونته مجبوردر. بربرينى قيصقانمق دگل، بلكه بِالعكس بربرينڭ فضله قوّتندن ممنون اولورلر. شعورلى فرض ايتديگمز بر چرخ، داها قوّتلى بر چرخى گورسه ممنون اولور. چونكه وظيفه‌سنى تخفيف ايدييور. حق و حقيقتڭ، قرآن و ايمانڭ خدمتى اولان بيوك بر خزينهِٔ عاليه‌يى اوموزلرنده طاشييان ذاتلر، قوّتلى اوموزلر آلتنه گيردكجه إفتخار ايدر، منّتدار اولور، شكر ايدر. صاقين بربريڭزه تنقيد قپوسنى آچمايڭز. تنقيد ايديله‌جك، قارداشلريڭزدن خارج دائره‌لرده چوق وار. بن ناصل مزيتڭزله إفتخار ايدييورم، او مزيتلردن بن محروم قالدقجه، سزده بولونديغندن ممنون اولويورم، كنديمڭدر تلقّى ايدييورم. سز ده استاديڭزڭ نظريله بربريڭزه باقماليسڭز. عادتا هر بريڭز اوته‌كينڭ فضيلتلرينه ناشر اولڭز.

سعيد النورسى

٭ ٭ ٭

سَوْگيلى و محترم استادم!

سوزلريڭزڭ (يعنى رساله‌لريڭزڭ) هر برى برر دواىِ عظيمدر. سوزلريڭزدن پك چوق فيض آلييورم. او قدر كه، اوقودقجه تكرار ايتمه‌يى ايسته‌يورم. و تكرارنده طويديغم إلٰهى بر ذوقى تعريف ايده‌ميه‌جگم. بوگون سوزلريڭزدن دگل هپسنى، بر دانه‌سنى آلان إنصافله اوقورسه، حقّى تسليمه و منكِر ايسه گيتديگى يولى تركه، فاسق ايسه توبه‌يه مجبور اولاجغنه قطعيًا اميدوارم.

خسرو

٭ ٭ ٭