ديدم: چونكه بش منفى أساس اوزرينه تأسّس ايتمشدر. نقطهِٔ إستنادى قوّتدر. او ايسه شأنى، تجاوزدر. هدفِ قصدى، منفعتدر. او ايسه شأنى، تزاحمدر. حياتده دستورى جدالدر. او ايسه شأنى، تنازعدر. كتله‌لر مابيْننده‌كى رابطه‌سى، آخَرى يوتمقله بسله‌نن عنصريت و منفى ملّيتدر. او ايسه شأنى، بويله مدهش تصادمدر. جاذبه‌دار خدمتى، هوا و هوسى تشجيع و آرزولرينى تطمين و مطالبنى تسهيلدر. او هوا ايسه شأنى، إنسانيتى درجهِٔ مَلكيه‌دن دركهِٔ كلبيته اينديرمكدر، إنسانڭ مسخِ معنويسنه سبب اولمقدر. بو مدنيلردن چوغى، أگر ايچى طيشنه چوريلسه قورد، آيى، ييلان، خنزير، مايمون پوستى گوروله‌جك گبى خياله گلير. ايشته اونڭ ايچون بو مدنيتِ حاضره، بشرڭ يوزده سكساننى مشقّته شقاوته آتمش· اوننى مُمَوَّهْ (خيالى) سعادته چيقارمش، ديگر اونى ده بَيْنَ بَيْنَ (ايكيسى اورته‌سى) بيراقمش. سعادت اودر كه: كلّه يا أكثره سعادت اوله. بو ايسه أقلِّ قليلڭدر كه، نوعِ بشره رحمت اولان قرآن آنجق عمومڭ، لا أقل أكثريتڭ سعادتنى تضمّن ايدن بر مدنيتى قبول ايدر. هم سربست هوانڭ تحكّميله، حوائجِ غيرِ ضروريه حوائجِ ضروريه حكمنه گچمشلردر. بدويتده بر آدم درت شيئه محتاج ايكن· مدنيت يوز شيئه محتاج و فقير ايتمشدر. سعى مصرفه كافى گلمديگندن حيله‌يه حرامه سَوق ايتمكله، أخلاقڭ أساسنى شو نقطه‌دن إفساد ايتمشدر. جماعته نوعه ويرديگى ثروت حشمته بدل، فردى شخصى فقير، أخلاقسز ايتمشدر.

قرونِ اولٰىنڭ مجموعِ وحشتنى بو مدنيت بر دفعه‌ده قوصدى!

عالمِ إسلامڭ شو مدنيته قارشى إستنكافى و صوغوق طاورانماسى و قبولده إضطرابى جاىِ دقّتدر. زيرا إستغنا و إستقلاليت خاصّه‌سيله ممتاز اولان شريعتده‌كى إلٰهى هدايت، روما فلسفه‌سنڭ دهاسيله آشيلانماز، إمتزاج ايتمز، بلع اولونماز، تابع اولماز... بر أصلدن توئم (ايكيز) اولارق نشئت ايدن أسكى روما و يونان ايكى دهالريله· صو و ياغ گبى مرورِ أعصار (عصرلر)، مدنيت و خرستيانلغڭ تمزيجنه چاليشديغى حالده، ينه إستقلاللرينى محافظه، عادتا تناسخله او ايكى روح شيمدى ده باشقه شكللرده ياشايورلر. اونلر توئم و أسبابِ تمزيج واركن إمتزاج اولونمازسه، شريعتڭ روحى اولان نورِ هدايت، او مظلم پيس مدنيتڭ أساسى اولان روما دهاسيله هيچ بر وقت مزج اولونماز، بلع اولونماز...