آلتنجى كلمه:

﴿اِهْدِنَا الصِّرَاطَ الْمُسْتَقِيمَ﴾

در. بونده‌كى حجّته غايت قيصه بر إشارت شودر:

أوت ناصل بر يردن بر يره گيدن يوللرڭ و بر نقطه‌دن اوزاق بر نقطه‌يه چكيلن خطلرڭ أڭ قيصه‌سى ايسه، أڭ طوغريسيدر و مستقيميدر. عينًا اويله ده· معنوياتده و معنوى يوللرده و قلبى مسلكلرده أڭ طوغريسى، أڭ مستقيمى ايسه أڭ قيصه و أڭ قولاييدر. مثلا: رسالهِٔ نورده بتون موازنه‌لرى و كفر و ايمان يوللرينڭ مقايسه‌لرى قطعى گوسترييورلر كه· ايمان و توحيد يولى، غايت قيصه و طوغرى و مستقيم و قولايدر. و كفر و إنكار يوللرى غايت اوزون و مشكلاتلى و تهلكه‌ليدر. ديمك بو إستقامتلى و حكمتلى و هر شيده أڭ قيصه و قولاى يولده سَوق ايديلن بو كائناتده، ألبته شرك و كفرڭ حقيقتلرى اولاماز و ايمان و توحيدڭ حقيقتلرى، بو كائناته گونش گبى لازم و واجبدر.

هم أخلاقِ إنسانيه‌ده أڭ راحت، أڭ فائده‌لى، أڭ قيصه، أڭ سلامتلى يول ايسه صراطِ مستقيمده، إستقامتده‌در. مثلا: قوّهِٔ عقليه، حدِّ وَسَط اولان حكمتى و قولاى، فائده‌لى إستقامتى غائب ايتسه، إفراط ويا تفريطله مضر بر جربزه‌يه و بلالى بر بلاهته دوشر، اوزون يوللرنده تهلكه‌لرى چكر. و قوّهِٔ غضبيه، حدِّ إستقامت اولان شجاعتى تعقيب ايتمزسه· إفراطله چوق ضررلى و ظلملى تهوّره و تجبّره و تفريطله چوق ذلّتلى و ألملى جبانت و قورقاقلغه دوشر.. إستقامتى غائب ايتمه‌سنڭ، خطاسنڭ جزاسى اولارق دائمى، وجدانى بر عذابى چكر. و إنسانده‌كى قوّهِٔ شهويه، سلامتلى إستقامتى و عفّتى ضايع ايتسه· إفراطله مصيبتلى، رذالتلى فجوره، فحشه و تفريطله خُموده، يعنى نعمتلرده‌كى ذوق و لذّتدن محروم دوشر و او معنوى خسته‌لغڭ عذابنى چكر.