سعيد النورسى

٭ ٭ ٭

﴿بِاسْمِهِ سُبْحَانَهُ﴾

عزيز، صدّيق قارداشلرم!

أوّلا:

﴿اَلْخَيْرُ فِيمَا اخْتَارَهُ اللّٰهُ﴾

سرّيله، إن شاء اللّٰه محكمه‌مزڭ تأخيرنده و تخليه اولان قارداشلريمزڭ ينه محكمه گوننده بوراده بولونمالرنده بيوك خيرلر وار.

أوت رسالهِٔ نورڭ مسئله‌سى· عالمِ إسلامده، خصوصًا بو مملكتده كلّى بر أهمّيتى بولونديغندن بويله هيجانلى طوپلامالر ايله عمومڭ نظرِ دقّتنى نور حقيقتلرينه جلب ايتمك لازمدر كه، اميديمزڭ و إحتياطمزڭ و گيزله‌مه‌مزڭ و معارضلرڭ كوچولتمه‌لرينڭ فوقنده و إختياريمزڭ خارجنده بويله شعشعه ايله رسالهِٔ نور كندى درسلرينى دوست و دشمنه آشكارًا ويرييور. أڭ محرم سرلرينى أڭ نامحرملره چكينميه‌رك گوسترييور. مادام حقيقت بودر، بز كوچوجك صيقنتيلريمزى كينين گبى بر آجى علاج بيلوب صبر و شكر ايتملىيز، "ياهو بو ده گچر" ديمه‌لىيز.