هم كلّى بر تأويل معناسندن مقامِ إدّعا جربزه‌سيله او قوماندانه بر حصّه چيقاروب اوڭا تطبيق ايتمش. بويله يوزده بر آدم آنجق فهم ايدن بر معنا، محرم و گيزلى بر رساله‌ده بولونماسنى هيچ بر قانون صوچ صاياماز. هم او رساله خارقه بر طرزده متشابه حديثلرڭ تأويللرينى بيان ايتمش. او بيان اوتوز قرق سنه أوّل اولديغى و اوچ محكمه‌يه و محكمه‌ڭزه و آنقره‌نڭ آلتى مقاماتنه اوچ سنه ظرفنده ايكى دفعه تقديم ايديلوب تنقيد گورمه‌ين مدافعه و إعتراضنامه‌مده قطعى جواب ويريلديگى حالده، او حديثڭ حقيقتنى بيان صددنده بر قصورلى شخصه مطابق چيقماسنى هيچ بر قانون صوچ صاياماز.

هم او شخصى تنقيد، او ايچنده بولونديغى و قصورلره سبب اولديغى بر إنقلابڭ حسناتى يالڭز اونڭ دگل، بلكه اوردونڭ و حكومتڭدر. اونڭ ده يالڭز بر حصّه‌سى وار. اونڭ قصورلرى ايچون اونى تنقيد ايتمك، ألبته بر صوچ اولماديغى گبى، إنقلابه هجوم ايدييور دينيله‌مز. هم بو قهرمان ملّتڭ أبدى بر مدارِ شرفى و قرآن و جهاد خدمتنده دنياده پيرلانطه گبى پك بيوك بر نشانى و قلنجلرينڭ پك بيوك و آنتيقه بر يادگارى اولان آياصوفيه جامعنى پوتخانه‌يه و مشيخت دائره‌سنى قيزلرڭ ليسه‌سنه چويرن بر آدمى سومه‌مك بر صوچ اولماسى إمكانى وار مى؟