آفيون مدّعىعموميسى و محكمه رئيسى و أعضالرينه

(دڭزلينڭ عدليه‌سنه حقوقمى مدافعه ايچون عرض ايتديگم "طوقوز أساسى" عينًا سزه ده تقديم ايدييورم.)

يگرمى سنه‌در حياتِ إجتماعيه‌يى و بِالخاصّه بويله رسمى و اينجه و سياسى حياتى ترك ايتمشم. او حاللره قارشى آلينمه‌سى لازم گلن وضعيتى بيلمييورم و دوشونمييورم و دوشونمسى بنى جدًّا اينجيتييور. فقط مجبوريتله باشقه محكمه‌ده إنصافسز بر ذاتڭ إنتظامسز و مكرّر و لزومسز پك چوق سؤاللرينه ويرديگم جوابلرڭ خاتمه‌سى و خلاصه‌سى اولان بو إنتظامسز مدافعاتم و إستدعامده بلكه صدد خارجى و لزومسز تكرارات و إنتظامسزلق و عليهمه دونه‌جك شدّتلى تعبيرلر و بيلمديگم يڭى قانونلره مخالف إفاده‌لر بولونه‌بيلير. فقط مادام حقيقت اوزره گيدييور، حقيقتڭ خاطرى ايچون او قصورلره باقمه‌مق گركدر. او إستدعا و مدافعاتم، "طوقوز أساس" اوزرينه گيدييور.

برنجيسى:

مادام حكومتِ جمهوريه، جمهوريتده‌كى حرّيتِ وجدان دستوريله، دينسزلره و سفاهتجيلره ايليشمييور. ألبته ديندارلره و تقواجيلره ده ايليشمه‌مك گركدر. و مادام دينسز بر ملّت ياشاماز و آسيا دين نقطه‌سنده آوروپايه بڭزه‌مز و إسلاميت حياتِ شخصيه و اُخرويه جهتنده خرستيانلغه اويماز و دينسز بر مسلمان باشقه دينسزلر گبى اولماز. و بو بيڭ سنه‌دن بَرى دنيايى ديانتيله ايشيقلانديران و بتون دنيانڭ تهاجماتنه قارشى، صلابتِ دينيه‌سنى قهرمانانه مدافعه ايدن بو وطنده‌كى ملّتڭ بر إحتياجِ فطريسى حكمنه گچن ديانت، صلاحت و بِالخاصّه ايمان حقيقتلرينڭ اوگرنمه‌سى يرلرينه هيچ بر ترقّيات، هيچ بر مدنيت طوتاماز و او إحتياجى اونلره اونوتديراماز. ألبته بو وطنده‌كى ملّته حكم ايدن بر حكومت، رسالهِٔ نوره عدالت و قانون و آسايش جهتنده ايليشه‌مز و ايليشديرمه‌ملى.