يگرمى سنه‌دن بَرى بر منزوينڭ ألبته إفاده‌ده‌كى قصورينه باقيلماز. رسالهِٔ نورى مدافعه ايتديگى ايچون، صدد خارجنه چيقدى دينيلمز. مادام أسكيشهر محكمه‌سى، محرم و غيرِ محرم يوز رساله‌لرى درت آى تدقيقدن صوڭره يالڭز بر ايكى رساله‌ده خفيف بر جزايه تماس ايده‌جك بر ايكى مادّه‌دن باشقه بولمامش و يوز يگرمى آدمدن اون بشنه آلتيشر آى جزا ويردى. بز دخى بو جزايى چكدك. و مادام بر قاچ سنه أوّل رسالهِٔ نورڭ بتون أجزالرى إسپارطه حكومتنڭ ألنه گچدى. بر قاچ آى تدقيقدن صوڭره، صاحبلرينه إعاده ايديلمش. و مادام او جزادن صوڭره قسطمونيده سكز سنه ظرفنده شدّتلى تحرّياتده ضابطه‌يى و عدليه‌يى علاقه‌دار ايده‌جك بر ترشّح بولونمامش. و مادام قسطمونيده‌كى صوڭ تحرّيده بر قسم رساله‌لريمڭ، هيچ بولونميه‌جق و نشر ايديلميه‌جك بر طرزده قاچ سنه أوّل اودون ييغينلرى آلتنه صاقلانمش اولديغى گوروندى و هيئتِ ضابطه‌جه تحقّق ايتدى. و مادام قسطمونيده پوليس مديرى و عدليه‌سى او صاقلانمش ضررسز كتابلريمى بڭا إعاده ايتمك اوزره قطعى سوز ويردكلرى حالده، ايكنجى گون بردن إسپارطه‌دن توقيف أمرى گلديگندن، داها او أمانتلريمى آلمادن سَوق ايديلدم. و مادام دڭزلى و آنقره محكمه‌لرى بزى برائت و عموم رساله‌لريمزى بزه إعاده ايتديلر. ألبته و ألبته بو مذكور آلتى حقيقته بناءً، دڭزلى محكمه‌سى و مدّعىعموميسى گبى، آفيون عدليه‌سى و مدّعىعموميسى بنم چوق أهمّيتلى بو حقوقمى نظرِ دقّته آلمالرى، وظيفه‌لرى مقتضاسيدر. و حقوقِ عموميه‌يى مدافعه ايدن مدّعىعموميدن، رسالهِٔ نور مناسبتيله أهمّيتلى بر حقوقِ عامّه حكمنه گچن بو شخصى حقوقمى ده مدافعه ايده‌جگنه اميدوارم و بكله‌يورم.