هم بتون ذىحياتڭ إحتياجاتِ فطريه‌لرى ايچون دعالرينه و حال ديلى ايله ايديلن بتون إلتجالره و آرزولره، وقتى وقتنه، قصد و إختيار و إراده‌يى گوسترر بر طرزده حدسز إنعاملريله و نهايتسز إحساناتيله فعلاً و حالاً صريح بر صورتده قونوشان بر متكلّمِ عليم· هيچ ممكن ميدر، هيچ عقل قبول ايدر مى، أڭ جزئى بر ذىحيات ايله فعلاً و حالاً قونوشسون و تام دردينه درمان يتيشديرن إحسانيله دردينى ديڭله‌سين و إحتياجنى گورسون و بيلسين و بتون كائناتڭ أڭ منتخب نتيجه‌سى و أرضڭ خليفه‌سى و أكثر مخلوقاتِ أرضيه‌نڭ قوماندانلرى اولان إنسانلرڭ معنوى رئيسلرى ايله گوروشمه‌سين؟ اونلرله، بلكه هر ذىحيات ايله فعلاً و حالاً قونوشديغى گبى، اونلر ايله قَولاً و كلامًا قونوشماسين و اونلره فرمانلرى و صحف و كتابلرى گوندرمسين؟ حاشا، حدسز حاشا!

ديمك ايمانِ بِاللّٰه، قطعيتيله و حدسز حجّتلريله "و بِكُتُبِهِ و رُسُلِهِ" يعنى پيغمبرلره و مقدّس كتابلره ايمانى إثبات ايدر.

هم هيچ بر جهتِ إمكانى وار مى و هيچ عقل قبول ايدر مى كه· بتون مصنوعاتيله كندينى طانيتديرانه و سَوْديرنه و تشكّراتى فعلاً و حالاً ايسته‌ينه مقابل· كائناتى ولوَله‌يه ويرن حقيقتِ قرآنيه ايله ذو الجلال او صنعتكارى أكمل بر طرزده طانييوب و طانيتديروب و سَووب و سَوْديروب و تشكّر ايدوب و ايتديروب و "سبحان اللّٰه" "الحمد ِللّٰه" "اللّٰه أكبر"لر ايله كُرهِٔ أرضى سماواته ايشيتديره‌جك درجه‌ده قونوشديروب و قره و دڭزلرى جذبه‌يه گتيره‌جك بر وضعيتله، بيڭ اوچ يوز سنه ظرفنده نوعِ بشرڭ كميةً بشدن بريسنى و كيفيةً و إنسانيةً ياريسنى آرقه‌سنه آلوب او خالقڭ بتون تظاهرِ ربوبيتنه گنيش و كلّى بر عبوديتله مقابله ايدن و بتون مقاصدِ إلٰهيه‌سنه قارشى قرآنڭ سوره‌لريله كائناته و عصرلره باغيران، درس ويرن، دلاّللق ايدن و نوعِ إنسانڭ شرفنى و قيمتنى و وظيفه‌سنى گوسترن و بيڭ معجزاتيله تصديق ايديلن محمّد عليه الصلاة والسلام، أڭ منتخب مخلوقى و أڭ مكمّل ألچيسى و أڭ بيوك رسولى اولماسين؟ حاشا و كلاّ! يوز بيڭ دفعه حاشا!