رسالهِٔ النورده يگرمى سكزنجى سوزده و باشقه رساله‌لرنده، حشرڭ جسمانيتى جهتنده گلن ضعيف شبهه‌لره قوّتلى جوابلرينه إكتفاءً بوراده يالڭز بر قيصه إشارتله ديرز كه: أسماءِ إلٰهيه‌نڭ أڭ جمعيتلى آيينه‌سى جسمانيتده‌در. و خلقتِ كائناتده‌كى مقاصدِ إلٰهيه‌نڭ أڭ زنگينى و فعّال مركزى جسمانيتده‌در. و إحساناتِ ربّانيه‌نڭ أڭ چوق چشيدلرى و رنگارنكلرى جسمانيتده‌در. و بشرڭ إحتياجات ديللريله خالقنه قارشى دعالرينڭ و تشكّراتنڭ أڭ كثرتلى تخملرى ينه جسمانيتده‌در. معنويات و روحانيات عالملرينڭ أڭ متنوّع چكردكلرى ينه جسمانيتده‌در. بونلره قياسًا، يوزر كلّى حقيقتلر جسمانيتده تمركز ايتديگندن، خالقِ حكيم زمين يوزنده جسمانيتى چوغالتمق و مذكور حقيقتلره مظهر أيله‌مك ايچون اويله سرعتلى و دهشتلى بر فعاليتله قافله قافله آرقه‌سنه موجوداته وجود گيديرر، او مشهره گوندرر. صوڭره اونلرى ترخيص ايدر، باشقه‌لرينى گوندرر. متماديًا كائنات فابريقه‌سنى ايشلتديرر. جسمانى محصولاتى طوقويوب، زمينى آخرته و جنّته بر فدانلق باغچه‌سى حكمنه گتيرر. حتّى إنسانڭ جسمانى معده‌سنى ممنون ايتمك ايچون، او معده‌نڭ حال ديليله بقاسنه دائر دعاسنى كمالِ أهمّيتله ديڭله‌يوب قبول ايده‌رك فعلاً جواب ويرمك ايچون، حدسز و حسابسز و يوز بيڭلر طرزلرده و بيڭلر چشيد چشيد لذّتلرده غايت صنعتلى طعاملرى و غايت قيمتلى نعمتلرى جسمانيته إحضار ايتمك، بداهتله و شكسز گوسترر كه· دارِ آخرتده جنّتڭ أڭ چوق و أڭ متنوّع لذّتلرى جسمانيدر. و سعادتِ أبديه‌نڭ أڭ أهمّيتلى و هركسڭ ايستديگى و اُنسيت ايتديگى نعمتلرى جسمانيدر.