برنجى برهان:

ناصلكه ايشلنمش بر أثرڭ گوزللگى ايشلمه‌سنڭ گوزللگنه و ايشله‌مك گوزللگى اوسته‌لغڭ او صنعتدن گلن عنواننڭ گوزللگنه و اوسته‌ده‌كى صنعتكارلق عنواننڭ گوزللگى او صنعتكارڭ او صنعته عائد صفتنڭ گوزللگنه و صفتنڭ گوزللگى قابليت و إستعدادينڭ گوزللگنه و قابليتنڭ گوزللگى ذاتنڭ و حقيقتنڭ گوزللگنه درجهِٔ بداهتده غايت قطعى بر صورتده دلالت ايتديگى گبى، عينًا اويله ده: بو كائناتڭ باشدن باشه بتون گوزل مخلوقلرنده و ياپيليشلرى گوزل عموم مصنوعلرنده‌كى حسن و جمال دخى صنعتكارِ ذو الجلالده‌كى فعللرينڭ حسن و جمالنه قطعى شهادت و أفعالنده‌كى حسن و جمال ايسه، او فعللره باقان عنوانلرڭ، يعنى إسملرڭ حسن و جمالنه شبهه‌سز دلالت و إسملرڭ حسن و جمالى ايسه، إسملرڭ منشئى اولان قدسى صفتلرڭ حسن و جمالنه قطعى شهادت و صفتلرڭ حسن و جمالى ايسه، صفتلرڭ مبدئى اولان شئوناتِ ذاتيه‌نڭ حسن و جمالنه قطعى شهادت و شئوناتِ ذاتيه‌نڭ حسن و جمالى ايسه، فاعل و مسمّا و موصوف اولان ذاتنڭ حسن و جمالنه و ماهيتنڭ قدسى كمالنه و حقيقتنڭ مقدّس گوزللگنه بداهت درجه‌ده قطعى بر صورتده شهادت ايدر. ديمك صانعِ ذو الجمالڭ كندى ذاتِ أقدسنه لايق اويله حدسز بر حسن و جمالى وار كه، بر گولگه‌سى بتون موجوداتى باشدن باشه گوزللشديرمش و اويله منزّه و مقدّس بر گوزللگى وار كه، بر جلوه‌سى كائناتى سربسر گوزللشديرمش و بتون دائرهِٔ ممكناتى حسن و جمال لمعه‌لريله تزيين ايدوب ايشيقلانديرمش.

أوت ايشلنمش بر أثر فعلسز اولماديغى گبى، فعل دخى فاعلسز اولاماز. و إسملر مسمّاسز اولماسى محال اولديغى گبى، صفتلر دخى موصوفسز ممكن دگلدر. مادام بر صنعتڭ و أثرڭ وجودى، بداهتله او أثرى ايشله‌يه‌نڭ فعلنه دلالت و او فعلڭ وجودى، فاعلنڭ و عنواننڭ و أثرى إنتاج ايدن صفتڭ و إسمنڭ وجودلرينه دلالت ايدر. ألبته بر أثرڭ كمالى و جمالى دخى فعلڭ كندينه مخصوص كمال و جمالنه، او ده إسمڭ كندينه مناسب موافق گوزللگنه، او دخى ذاتڭ و حقيقتڭ (فقط ذاته و حقيقته لايق و موافق) كمالنه و جمالنه علم اليقين ايله و بداهتله دلالت ايدر.