﴿بِاسْمِهِ سُبْحَانَهُ﴾

بن، سنڭ إجتهادڭده خطا وار ديينلره و إثبات ايدنلره تشكّر ايدوب روح و جانله منّتدارم. فقط شيمدىيه قدر او إجتهاديمى تماميله قناعتله تام تصديق ايدنلر، بيڭلر أهلِ ايمان و اونلردن چوقلرى أهلِ علم تصديق ايتدكلرى و بن ده دهشتلى بر زمانده قدسى بر تسلّىيه محتاج اولديغم بر هنگامده، صِرف أهلِ ايمانڭ ايماننى رسالهِٔ نور ايله محافظه نيّتِ خالصه‌سيله و نجم الدّينِ كبرا، محيى الدينِ عرب گبى بيڭلر أهلِ إشارات گبى جفرى و رياضى حسابيله بيان ايديلن بر مژدهِٔ إشاريهِٔ قرآنيه‌يى كندينه گلن بر قناعتِ تامّه ايله، هم محرم طوتولمق شرطيله بيان ايتديگم و او إجتهادمده أڭ معنّد دينسزلره ده إثبات ايتمگه حاضرم، ديديگم حالده بنى غيبت ايتمك، دنياده بوڭا هانگى مذهبله فتوا ويريله‌بيلير، هانگى فتوايى بولويورلر؟ بن هر شيدن وازگچه‌رم، فقط عدالتِ إلٰهيه‌نڭ حضورنده بو دهشتلى غيبته قارشى حقّمى حلال ايتمه‌م! تيتره‌سين!.. بتون ساداتڭ جدّى اولان فخرِ عالم عليه الصلاة والسلامڭ سنّتِ سنيه‌سنى محافظه ايچون حياتنى و هر شيئنى فدا ايدن بر مظلومڭ شكواسى، ألبته جوابسز قالميه‌جق!..

إلاّ بر شرط ايله حلال ايده‌بيليرم كه: بو رمضانِ شريفده بڭا و خالص قارداشلريمه ويرديگى أنديشه و تلاشى، حقپرستلك طماريله، بيوكلره لايق علوِّ جنابله، أنانيتِ تعصّبكارانه‌سنى حقيقته و إنصافه فدا ايدوب تعميره چاليشماسيدر· مشفق و منصف بر خواجه طوريله، قصوريمز وارسه بزه لطفكارانه إخطار و ايقاظدر. جنابِ حق ستّار العيوبدر، حسنات سيّئاته مقابل گلسه عفو ايدر. ايمان خدمتنده يوز بيڭلر إنسانڭ )$Vاننى تحقيقى ياپمق حسنه‌سنه قارشى، بنم گبى بر بيچاره‌نڭ حسنِ نيّتله، قوّتلى أماره‌لرله عنايتِ إلٰهيه‌دن تصوّر ايتديگى بر مژدهِٔ قرآنيه‌نڭ تفهّمنده بر ياڭليش، بلكه يوز ياڭليش وارسه ده، او حسناته قارشى گله‌مز، سترِ عيوب پرده‌سنى ييرتاماز! هر نه ايسه.