يگرمى يدنجى مكتوبڭ لاحقه‌سندن آلينمش مهمّ پارچه‌لر

برنجى مسئله:

برنجى شعاعده بر ايكى آيتڭ إشارتنده، رسالهِٔ نورڭ صادق طلبه‌لرى ايمان ايله قبره گيره‌جكلرينى و أهلِ جنّت اولاجقلرينى، قدسى بر مژده و قوّتلى بر بشارت بولونديغى گوستريلمشدر. فقط بو پك بيوك مسئله‌يه و چوق قيمتدار إشاراته تام قوّت ويره‌جك بر دليل ايستر دييه بكلردم. چوقدن بَرى منتظردم. ِللّٰه الحمد ايكى أماره بردن قلبمه گلدى:

برنجى أماره:

ايمانِ تحقيقى علم اليقيندن حقّ اليقينه ياقينلاشدقجه داها سلب ايديلميه‌جگنه أهلِ كشف و تحقيق حكم ايتمشلر. ديمشلر كه: سكرات وقتنده شيطان وسوسه‌سيله آنجق عقله شبهه‌لر ويروب تردّده دوشوره‌بيلير. بو نوع ايمانِ تحقيقى ايسه يالڭز عقلده طورمييور. بلكه هم قلبه، هم روحه، هم سرّه، هم اويله لطائفه سرايت ايدييور، كوكله‌شييور كه، شيطانڭ ألى او يرلره يتيشه‌مييور· اويله‌لرڭ ايمانى زوالدن محفوظ قالييور.

بو ايمانِ تحقيقينڭ وصولنه وسيله اولان بر يولى، ولايتِ كامله ايله كشف و شهود ايله حقيقته يتيشمكدر. بو يول أخصِّ خواصّه مخصوصدر، ايمانِ شهوديدر.

ايكنجى يول: ايمانِ بِالغيب جهتنده سرِّ وحيڭ فيضيله برهانى و قرآنى بر طرزده، عقل و قلبڭ إمتزاجيله حقّ اليقين درجه‌سنده بر قوّت ايله، ضرورت و بداهت درجه‌سنه گلن بر علم اليقين ايله حقائقِ ايمانيه‌يى تصديق ايتمكدر. بو ايكنجى يول· رسالهِٔ نورڭ أساسى، مايه‌سى، تملى، روحى، حقيقتى اولديغنى خاص طلبه‌لرى گورويورلر. باشقه‌لرى دخى إنصافله باقسه‌لر، رسالهِٔ نورڭ حقائقِ ايمانيه‌يه مخالف اولان يوللرى غيرِ ممكن و محال و ممتنع درجه‌سنده گوسترديگنى گوره‌جكلر.