فيضيله أمين دييورلر: استاديمز اولان رسالهِٔ نورڭ جدّى حقائقلرى ايچنده أڭ طاتلى بر فاكهه‌سى توافق اولديغى ايچون، قارداشلريمزه ينه بو ايكى گون ظرفنده كوچك بر ايكى توافقى، سزه بوندن أوّلكى توافقه حاشيه اولارق يازييورز:

أوت ناصلكه كلماتده و كلماتِ مكتوبه‌ده توافق· بر قصد، بر عنايتِ خصوصيه‌يى گوسترييور. بعضًا خارقه اولوب كرامت درجه‌سنه چيقييور. بعضًا لطيف بر ظرافت ويرييور. عينًا اويله ده، رسالهِٔ نوره عائد و استاديمزه عائد حادثاتده ده عينًا قصدى و عنايتكارانه توافقى، أقوالده اولديغى گبى، او أفعالده ده گورويورز. أزجمله:

سزه يازيلان، درت آى گلمه‌ين خانه صاحبه‌سى ايچون أمين قارداشمزه ديدى: "خبر گوندر" تكلّمنده، اونڭ قپو چالماسى توافق ايتديگى گبى· عين جمله‌يى بر گون صوڭره ايكى دفعه اوقوديغى زمان، "أمينه ديديگى" كلمه‌سى اوقونديغى آننده، آشاغيده‌كى قپويى أمين آچدى. گلمك زمانى گلمه‌دن گلدى. ايكنجى گون، ينه باشقه بر آدمه اوقونديغى وقت، "أمينه ديديگى" كلمه‌سنى اوقوديغى وقت، عين آنده يوقارى قپويى أمين آچدى، گلمه عادتنه مخالف اولارق گلدى، گيردى. بو ايكى توافق، خانه صاحبه‌سنڭ توافقنه توافقى گوسترييور كه· أڭ جزئى ايشلريمز ده تصادف دگل، قصدى توافقدر.

هم درت آى أوّل بزه بر پارچه تارخانه گتيرن رسالهِٔ نور شاكردلرندن فؤادڭ إستانبوله گيدوب، اوتوز گون تأخيرندن گج قالماسندن أنديشه ايتديگمز عين گونده، اونڭ تارخانه‌سى بيتديگى عين گونده گلمه‌سى، توافق ايتدى.

هم عين گونده، بر پارچه تره‌ياغى، (بز ده استاديمز ده بونڭ بركتنى حسّ ايدييوردق) بيتديگى دقيقه‌ده اونڭ مقدارينه‌ توافق ايدوب، ظنّمزجه عين يردن، عين مقدار، عين زمانده گلديگى گبى· هم بورالرده كويلرده، كول ايچنده ياپيلان بر چورك، استاديمزڭ خوشنه گيتديگى ايچون صباح آقشام اوندن ييوب و اون بش گون دوام ايدن و بيتديگى عين گونده، عين چوركدن، اونڭ أقرباسندن بريسى گتيردى. بو توافقڭ خاطرى ايچون گرى چويرمدى، قبول ايتدى. گوزيمزله بو لطيف توافقده‌كى شيرين عناياتِ إلٰهيه‌نڭ جزئى جلوه‌لرينى گوردك و آڭلادق كه، كور تصادف ايشمزه قاريشمييور. معنيدار توافق، رسالهِٔ نورڭ كلماتنده و حروفاتنده اولديغى گبى، اوڭا تماس ايدن حركات و أفعالده دخى معنيدار توافقلر وار. عنايته تماس ايتديگى ايچون، أڭ جزئى بر شى ده اولسه قيمتى بيوكدر. بويله اوزون يازمق و زياده أهمّيت ويرمك إسراف اولماز. چونكه، معناسى اولان عنايت و إلتفاتِ رحمت مراددر. و او بحث ده، معنوى بر شكردر.

رسالهِٔ نور شاكردلرندن

أمين، فيضى

٭ ٭ ٭