عزيز، صدّيق قارداشلرم!

بوگونلرده رموزاتِ ثمانيه‌يه عائد ايكى رساله‌يى أهمّيتلى طلبه‌لره، بر يره گوندردم. يول قپاندى، گيتمه‌دى. او ايكى رساله‌يى تكرار دقّتله مطالعه ايتدم. فكرًا ديدم كه: "بو ذوقلى و گوزل و مراقلى، شيرين بر مقصده گيدن بو توافقلى يولده نه ايچون سوق ايديلمه‌دن پرده ايندى، باشقه يولده سوق ايديلدك، چاليشديريلدق."

بردن إخطار ايديلدى كه: او غيبى أسرارى آچاجق اولان مسلكدن يوز درجه داها أهمّيتلى و قيمتلى و عمومى إحتياجه مدار و هركس بو زمانده اوڭا شدّتله محتاج و إسلاميتڭ تمل طاشلرى اولان حقائقِ ايمانيه خزينه‌سنه خدمت ايتمگه و إستفاده‌يه ضرر گله‌جكدى. چونكه او أسرارِ غيبيه، ذوقلى و مراقلى اولديغى ايچون نظرى كندينه چكه‌جكدى. أڭ بيوك و أڭ يوكسك مقصد اولان حقائقِ ايمانيه‌يى، ايكنجى درجه‌ده بيراقه‌جقدى. اونڭ ايچون ايدى كه، سورهِٔ

﴿اِذَا جَاءَ نَصْرُ اللّٰهِ﴾

رمزنده، أسرارِ غيبى گوستريلدى· بردن قپاندى، پرده ايندى. هم بو سرّ ايچون ايدى كه، او يولده إستخدام ايديلمدك، يالڭز او مسلكِ توافقيه‌نڭ ترشّحاتندن رسالهِٔ نورڭ حقّانيتنه بر إمضا و جزالتنه بر زينت و حروفِ قرآنيه‌نڭ إنتظامندن و وضعيتندن تظاهر ايدن بر نوع إعجاز چيقدى. داها او يولده چاليشديريلمدق.

سعيد النورسى

٭ ٭ ٭