ايكنجى سؤال:

كرامت إظهار ايديلمزسه داها أولٰى اولديغى حالده، نه‌دن سن إعلان ايدرسڭ؟

الجواب: بو، بڭا عائد بر كرامت دگلدر. بلكه قرآنڭ إعجازِ معنويسندن ترشّح ايده‌رك خاص بر تفسيرندن كرامت صورتنده بزلره و أهلِ ايمانه بر إكرامِ ربّانى و إنعامِ إلٰهيدر. ألبته معجزهِٔ قرآنيه و اونڭ لمعه‌لرى إظهار ايديلير. و نعمت ايسه، شكر نيّتيله إعلان ايتمك، بر تحديثِ نعمتدر.

﴿وَ اَمَّا بِنِعْمَةِ رَبِّكَ فَحَدِّثْ﴾

آيتى إظهارينه أمر ايدر. بنم ايچون مدارِ فخر و غرور اولاجق بر لياقتم و إستحقاقم اولماديغنى قَسَمله إعتراف ايدييورم. بن چكردك گبى چورودم و قورودم. بتون قيمت و حيات و شرف او چكردكدن چيقان شجرهِٔ رسالهِٔ نور و معجزهِٔ معنويهِٔ قرآنيه‌يه گچمش بيلييورم. و اويله إعتقاد ايتديگمدن إعجازِ قرآنى حسابنه إظهار ايدرم. بتون قيمت بر معجزهِٔ قرآنيه اولان رسالهِٔ نورده‌در. حتّى أسكيدن بَرى طاشيديغم بديع الزمان إسمى اونڭ ايمش، ينه اوڭا إعاده ايديلدى. رسالهِٔ نور ايسه، قرآنڭ ماليدر و معناسيدر. بو رمزده خصوصى قناعتمى تأييد ايدن و كنديمه مخصوص چوق أماره و قرينه‌لر وار. فقط باشقه‌لره إثبات ايده‌مديگمدن يازه‌مييورم. يالڭز ايكى اوچنه إشارت ايتمگه مناسبت گلمش.