هم مادام آلتى آيدن صوڭره شيمدى ماكينه‌يه مساعده ايتديڭز· تصحيحلى نسخه‌لردن بر نسخه‌يى ماكينه ايله مقاماته ويريلمك ايچون يازانه ويريڭز و بر نسخه‌يى ده بڭا ويريڭز كه اونڭله تصحيح ايده‌يم دييه چوق إصرار ايتدم. يالڭز بر نسخه بڭا ويردى. اوته‌كيلرى مصادره ايتدى، ويرمدى. حالبوكه كندى إعترافيله عينِ حقيقت اولديغنى سويله‌دى. رئيسِ جمهوره و آغير جزا محكمه‌سنه و مجلسِ مبعوثان رياستنه عينِ حقيقت بر مدافعه‌نامه رساله‌سنڭ مصادره ايتمك ايچون دنياده هيچ بر قانون اولاماز و إحتمال ويرمييورم. هم عين مسئله‌ده مشترك آدملرڭ أللرنده او مشترك مدافعه‌نامه بولونماسنڭ ياساق اولماسى هيچ بر حكومتڭ قانوننده يوقدر و اولماز بيلييورم. بز بويله خلافِ قانون مسئله‌لره هدف اولمشز، شيمدىيه قدر صبر ايتدك. صبريمز قالمادى.

رسالهِٔ النورڭ حقوقنى مدافعه ايتمك ايچون أهمّيتلى بر طلبم و بر رجام وار. رسالهِٔ النور عموم عالمِ إسلامه تعلّق ايده‌جك حقائقى جامع اولديغندن، محقّق علمادن و فيلسوفلردن أهلِ وقوف بر هيئتِ علميه‌يى تشكيل ايدوب (غايت محرملر محدود بر ايكى رساله خارج اولارق) بتون رساله‌لريمى تدقيق ايچون دڭزلى آغير جزا محكمه‌سى آنقره آغير جزا محكمه‌سنه سَوق ايتمشدر. بو مملكته مادّى و معنوى بركتى و فوق العاده خدمتى اوتوز اوچ آياتِ قرآنيه‌نڭ إشارتيله و إمامِ علىنڭ رضى اللّٰه عنه اوچ كراماتِ غيبيه‌سيله و غوثِ أعظمڭ (قس) قطعى إخباريله تحقّق ايتمش اولان رسالهِٔ النوره عائد دعوا و إعتراض جزئى بر حادثه و شخصى بر مسئله دگل كه أهمّيت ويريلمه‌سين. بلكه بو ملّتى و مملكتى و حكومتى جدّى علاقه‌دار ايده‌جك، طولاييسيله عالمِ إسلامڭ نظرِ دقّتنى أهمّيتلى بر صورتده جلب ايده‌جك بر كلّى حادثه حكمنده عمومى بر مسئله‌در.