ايشته بو غزته‌نڭ ده حرب بوغوشمالرينه عائد رسملرينه باقييوردم. نظريمه چارپان بيوك يازى ايله يازيلمش بر ستونده، آناطولينڭ يگرمى بر ولايتنى صارصان و شباطڭ برنجى گوننڭ گيجه‌سنده صباحه قارشى هركس اويقوده ايكن وقوعه گلن و پك چوق ضايعاته مال اولان دهشتلى بر زلزله‌يى خبر ويرييوردى. درحال، شباطڭ اوچنده محكمه‌ده سَوْگيلى استاديمزڭ هيئتِ حاكمه‌يه "زنديقلرڭ دنيالرى باشلرينى يسين و ييه‌جك" دييه تكرار تكرار سويله‌ديگى سوزلرى خاطرلادم. "أيواه!" ديدم، "رسالهِٔ النور إصلاح ايدر، إفساد ايتمز، إعمار ايدر، خراب ايتمز· مسعود ايدر، پريشان ايتمز" دييه سويلركن، "عكسيله قارشيلايه‌رق بزى و رسالهِٔ النورى إتهام ايتمك، خالقڭ خوشنه گيتمييور." ديدم.

ايشته مركزى گره‌ده، بولى و دوزجه اولان بو قانلى زلزله، رسالهِٔ النورڭ دردنجى بر كرامتى ايدى. بو غزته شو معلوماتى ويرييور: آنقره، بولى، زونغولداق، چنغرى و إزميت ولايتلرنده فضله غائبلر وارمش. گره‌ده‌ده ايكى بيڭ أو ييقيلمش، ييقيلميان أولر ده اوطوريلميه‌جق درجه‌ده خراب اولمش، بيڭدن فضله ئولو وارمش. دوزجه‌ده ضرر چوقمش، ئولو و ياره‌ليلرڭ مقدارى بللى دگلمش. آنقره‌ده يوز اوچ ئولو و بر او قدر ده ياره‌لى وارمش. بيڭه ياقين أو ييقيلمش. دبّاغخانه‌ده ايكى أو چوكمش، بعض كويلرده صارصينتىيى متعاقب يانغينلر اولمش. ايلك صارصينتى چوق قوّتلى اولمش، صارصينتىيى ير آلتندن گلن بر طاقم گورولتيلر تعقيب ايتمش. بولىده و ديگر يرلرڭ كويلرندن بر هفته گچديگى حالده هنوز معلومات آلينه‌مييورمش. دوزجه‌ده ايكى يوز بش أو ييقيلمش، اون بر ئولو وارمش. بولى ايله تلغراف و تلفون خطلرى كسيلمش، زلزله منطقه‌سنده شدّتلى بر قار فورطنه‌سى حكم سورويورمش. إزميتده زلزله اولوركن شمشكلر چاقمش، شهر بر قاچ ثانيه آيدينلق ايچنده قالمش. بر چوق يرلرده خلق چيريلچيپلاق سوقاقلره فيرلامش. دنيانڭ بتون رصدخانه‌لرى بو بيوك آناطولى زلزله‌سنى قيد ايتمش. بر إنگليز رصدخانه‌سى صارصينتينڭ چوق خراب ايديجى اولديغنى بيلديرمشدر. سينوبده عين گون چوق قورقونج بر فورطنه اولمش، گوك گورولتيلرى و شمشكلرله گيتدكجه شدّتنى آرتيرمشدر.