﴿بِاسْمِهِ سُبْحَانَهُ﴾

رئيس بك أفندى،

قرارنامه‌ده اوچ مادّه أساس طوتولمش:

بريسى:

جمعيتدر. بن بوراده‌كى بتون رسالهِٔ النور شاكردلرينى و بنمله گوروشنلرى ويا اوقويان و يازانلرينى عينيله إشهاد ايدييورم، اونلردن صوريڭز كه، بن هيچ بريسنه ديمه‌مشم: "بر جمعيتِ سياسيه ويا جمعيتِ نقشيه تشكيل ايده‌جگز." دائما ديديگم بودر: بز ايمانمزى قورتارمغه چاليشه‌جغز. عموم أهلِ ايمان داخل اولدقلرى و اوچ يوز ميليوندن زياده أفرادى بولونان بر مقدّس جماعتِ إسلاميه‌دن باشقه مابيْنمزده مدارِ بحث اولماديغنى و قرآنده "حزب اللّٰه" نامى ويريلن و عموم أهلِ ايمانڭ اخوّتى جهتيله كنديمزى، قرآنه خدمتمز ايچون حزب القرآن، حزب اللّٰه دائره‌سنده بولمشز. أگر قرارنامه‌ده بو معنا مراد ايسه، بتون روحمزله، كمالِ إفتخار ايله إعتراف ايدرز. أگر باشقه معنالر مراد ايسه، اونلردن خبريمز يوقدر!

ايكنجى مادّه:

قرارنامه‌نڭ إعترافيله، قسطمونى ضابطه‌سنڭ راپور و تصديقيله، هيچ نشر اولونميه‌جق طرزده اودون و كومور ييغينلرى آلتنده و ميخلى صندوقلرده بولونان و أسكيشهر محكمه‌سنڭ تدقيقندن و تنقيدندن گچن و بر خفيف جزايى چكديرن و قطعيًا محرم طوتولان تستّر رساله‌سى و هجماتِ ستّه و ذيلى رساله‌سى گبى كتابلردن بعض جمله‌لرينه ياڭليش معنا ويره‌رك طوقوز سنه أوّلكى زمانه بزى گوتوروب، جزاسنى چكديگمز صوچيله مسئول ايتمك ايسته‌يور.