حپسِ منفردده موقوف

سعيد النورسى

٭ ٭ ٭

(أڭ مهم پارچه بودر)

﴿بِسْمِ اللّٰهِ الرَّحْمٰنِ الرَّحِيمِ﴾

(بر جمعه گوننڭ بر قاچ ساعتنڭ بر محصوليدر.)

مدّعى عمومى بك!

يگرمى سنه‌در حياتِ إجتماعيه‌يى و بِالخاصّه بويله رسمى و اينجه و سياسى حياتى ترك ايتمشم. او حاللره قارشى آلماسى لازم گلن وضعيتى بيله‌مييورم و دوشونه‌مييورم و دوشونمسى بنى جدًّا اينجيتييور. فقط مجبوريتله إسپارطه‌ده إنصافسز بر ذاتڭ إنتظامسز و مكرّر و لزومسز پك چوق سؤاللرينه ويرديگم جوابلرڭ خاتمه‌سى و خلاصه‌سى وصورغو حاكمنڭ ضبطنه گچن و آيريجه سزه ويريلمش اولان إنتظامسز مدافعاتم و إستدعامده بلكه صدد خارجنده و لزومسز و تكرار و إنتظامسزلق و عليهمه دونه‌جك شدّتلى تعبيرلر و بيله‌مديگم يڭى قانونلره مخالف إفاده‌لر بولونه‌بيلير. فقط مادام حقيقت اوزره گيدييور، حقيقتڭ خاطرى ايچون او قصورلره باقمه‌مق گركدر. او إستدعا ده اوچ – درت بلكه طوقوز أساس اوزرينه گيدييور.