مادام جمهوريت پرنسيبلرى حرّيتِ وجدان قانونيله دينسزلره ايليشمييور، ألبته ممكن اولديغى قدر دنيايه قاريشميان و أهلِ دنيا ايله مبارزه ايتمه‌ين و آخرتنه و ايماننه و وطنه دخى نافع بر طرزده چاليشان ديندارلره ده ايليشمه‌مك گركدر، ألزمدر. بيڭ سنه‌دن بَرى بو ملّتڭ غدا ويا علاج گبى بر حاجتِ ضروريه‌سى اولان تقوايى و صلاحتى بو مظهرِ أنبيا اولان آسياده حكم ايدن أهلِ سياست ياساق ايتمز و ايده‌مز بيلييورز.

وطن و ملّت و آسايشڭ منفعتى حسابنه بونى ده خاطرلتمق بر وظيفهِٔ وطنيه‌م اولماسى جهتيله ديرم: بويله بزه و رسالهِٔ نوره آز بر مناسبتله تحتِ توقيفه آلمق، گوجنديرمك يوزندن وطنه و آسايشه ديندارانه منفعتى و آنارشيلگه قارشى قوّتلى بر سد تشكيل ايدن يوز بيڭلر آدملرى إداره عليهنه فكرًا چويرمگه يول آچار و آنارشيلگه ميدان ويرر. أوت رسالهِٔ النور ايله ايمانلرينى قورتاران و ملّته ضررسز و تام منفعتدار بر وضعيته گيرنلر يوز بيڭدن چوق زياده‌در. حكومتِ جمهوريه‌نڭ بلكه هر بيوك دائره‌سنده و ملّتڭ هر طبقه‌سنده فائده‌لى، مستقيمانه بر صورتده بولونويورلر. بونلرى گوجنديرمك دگل، بلكه حمايه ايتمك ألزمدر.

شكوامزى ديڭله‌مه‌ين و بزى سويلتمه‌ين و بهانه‌لر ايله صيقشديران بر قسم رسمى آدملر، وطن عليهنده آنارشيلگه ميدان آچييورلر دييه قوّتلى بر وهم خاطريمزه گلييور.

هم مصلحتِ حكومت نامنه ديرم: مادام بشنجى شعاعى محكمه‌لر تدقيق ايدوب ايليشمه‌مشلر، بزه ويرديلر. ألبته اونى، يڭيدن رسميته قويوب ديدى قوديلره ميدان آچمامق، إداره‌جه ضروريدر. بز او رساله‌يى، أسكيدن بَرى گيزلديگمز گبى، حكومت و محكمه دخى اونى مدارِ سؤال و جواب ايتمه‌ملى. چونكه قوّتليدر، ردّ ايديلمز! (١) قبل الوقوع خبر ويرمش، طوغرى چيقمش (٢). هم هدفى دنيا دگل، اولسه اولسه ئولمش گيتمش بر شخصه، متعدّد معنالرندن بر معناسى موافق گلييور (٣). اونڭ دوستلغى تعصّبى ايله او غيبى إخبارى و معنايى، رسميته قويمامايى و بزى اونڭله مؤاخذه ايتمكله داها زياده تشهيرينه يول آچمامغى، وطن و ملّت و آسايش و إداره حسابنه إخطار ايتمگه وجدانم بنى مجبور أيلدى.