و كذا شو معجزه‌لى و حكمتلى أفعالِ كريمانه‌نڭ تظاهراتندن آڭلاشيلييور كه، صانعِ فاعلڭ پك گيزلى كمالاتى واردر. و دائما او كمالاتى، أنظارِ عالمه عرض و تشهير ايتمك ايستر. چونكه دائمى بر كمال، دائمى بر تظاهر ايله تقدير ايديجيلرڭ دوامِ وجودلرينى إقتضا ايدر. چونكه عدمِ مطلقه نامزد اولان إنسان، كمالاته قيمت ويرمز و إستحسان و تقديره بدل إستثقال و تحقير ايدر.

و كذا بو گوزل، مزيَّن، منوّر مصنوعاتڭ صانعى ايچون مجرّد معنوى بر جمال واردر. و اونڭ، او مخفى حسن و جمال ايچون پك چوق محاسن و لطائفى واردر كه، قيصه عقللريمز ايله إدراك ايده‌مه‌يز. أزجمله، او جمالڭ كثيف آيينه‌لرندن برى سطحِ أرضدر. بو سطحِ أرض هر عصرده، هر موسمده، هر وقتده دائما تجلّى ايتمكده اولان او جلوه‌لرڭ گولگه‌لرينى تشهير، توصيف، إعلان و إظهار ايدر.

و كذا حقائقِ ثابته‌دندر كه، يوكسك بر جمال صاحبى بِالذّات كندى گوزيله و بِالواسطه باشقه‌سنڭ گوزيله، جمالنى و جمالنڭ اينجه‌لكلرينى گورمك ايسته‌يور. بناءً عليه جمال سرمدى و دائم اولورسه، بهمه‌حال اونڭ اينجه‌لكلرينى گوسترن آيينه‌لرينڭ ده أبدى و دائمى اولماسى ضروريدر. چونكه باقى بر حسن، فانى بر مشتاقه راضى اولاماز. و زائل و فانى بر عاشقڭ، أبدى و باقى اولان محبوبنه محبّتى عداوته قلب اولور. أوت إنسان، ألى ويا فهمى يتيشمديگى گوزل بر شيئى، كنديسنى تسلّى ايچون تقبيح ايدر. بو إعتبارله بو عالم، صانعى إستلزام ايتديگى گبى، صانع ده عالمِ آخرتى إستلزام ايدر.