و كذا إجراآتندن، فعاليتندن آڭلاشيلان پك خارقه بر إحتشام ايچنده بر سلطنتى واركن، ملّتنڭ إجتماعلرى ايچون يالڭز طار بر مسافرخانه ياپيلمش· دائمى اولارق ملّتى إستيعاب ايده‌مز، دائما طولار بوشالير. و بر إمتحان ميدانى وار· هر وقت دگيشير، تبدّل ايدر. و سلطانڭ بعض آثارِ صنعتنه و إحساناتنه بعض نمونه‌لر گوسترمك ايچون مجلسلرى وار· زمان زمان تحوّل ايدر.

بو وضعيت، بو طار منزل و ميدان و مشهردن صوڭره دائمى بر منزل، ثابت سرايلر، آچيق خزينه‌لر بولونوب و ساكنلرى ثابت و دائمى قالاجقلرينه بِالبداهه دلالت ايدر.

و كذا دقّت صاحبى بر سلطان كه، ملّتنڭ بتون أعماللرينى، أفعاللرينى، خدمتلرينى، حاجتلرينى تماميله يازار و يازديرر و ملكنده جريان ايدن هر بر حادثه و هر بر واقعه‌نڭ صورتلرينى، فوطوغرافلرينى آلوب تثبيت و حفظ ايدرسه· ألبته بو وضعيت، بر محاسبه‌نڭ، بر محاكمه‌نڭ، بر مكافات و مجازاتڭ وقوعه گله‌جگنه قطعى بر صورتده دلالت ايدر.

و كذا مكافات و مجازات حقّنده تكرار ايله پك چوق وعدلرى و تهديدلرى اولورسه و او وعد و وعيد ايديلن شيلر قدرتنه آغير گلمزسه و او شيلر رعيتى ايچون پك أهمّيتلى اولورسه، ألبته سوز ويرديگى شيلرده خلاف اولميه‌جقدر. چونكه خلف الوعد، قدرتڭ عزّتنه ضددر.

و كذا حدِّ تواتره بالغ اولان مخبرلرڭ إتّفاق و إجماعلرينه گوره، او محتشم و عظيم سلطنتڭ مدارى و جولانگاهى آنجق آخرت مملكتيدر. بو كوچك منزللر، ميدانلر او عظمته دائمى بر مكان اولاماز. چونكه بو گبى زائل، متبدّل شيلر، او مستقر سلطنته مقرّ اولاماز.