أوت بو آيتلرڭ صراحتنه‌ گوره: ئولوم· زوال، فراق، عدم قپوسى و ظلمات قويوسى اولمايوب· آنجق سلطانِ أزل و أبدڭ حضورينه گيرمك ايچون بر مدخلدر. بو بشارتڭ إشارتيله قلب عدمِ مطلق قورقوسندن، ألمندن قورتولور. أوت كفرڭ تضمّن ايتديگى جهنّمِ معنويه‌يه باق!

﴿اَنَا عِنْدَ ظَنِّ عَبْدِى بِى﴾

حديثِ قدسيسى سرّنجه، جنابِ حق كافرڭ ظن و إعتقادينى دائمى بر عذابِ أليمه قلب ايدر. صوڭره، ايمان و يقين ايله، جنابِ حقّڭ لقاسندن صوڭره، رضاسندن صوڭره، رؤيتندن صوڭره مؤمنلر ايچون حاصل اولان لذّتلرڭ درجه‌لرينه باق! حتّى جهنّمِ جسمانى، عارف اولان مؤمن ايچون، عاصيه كافرڭ جهنّمِ معنويسنه نسبةً جنّت گبيدر.

آرقداش! عالمِ بقايه دلالت ايدن براهيندن ماعدا، آرقه‌سنده صفلر تشكيل ايدوب دعالرينه بر آغزدن "آمين! آمين!" سويله‌ين أنبيا، أوليا، صدّيقين إماملرى، محبوبِ أزلينڭ حبيبِ أكرمى محمّد عليه الصلاة والسلامڭ تضرّعاتى، دعالرى، عالمِ بقاده إنسانڭ بقاسنه پك بيوك برهان و كافى بر وسيله‌در. چونكه· كائناتى سراپا إستيلا ايدن شو حُسنلر، گوزللكلر، جماللر، كماللر· او حبيبڭ تضرّعاتنى ايشيتمه‌مك ويا قبول ايتمه‌مك قدر چركين، قبيح، قصور، نقص عدّ ايديله‌جك بر شيئه مساعده ايدر مى؟ جنابِ حق بتون نقائصدن، چركين شيلردن منزّه، مبرّا دگل ميدر؟ ألبته منزّهدر.

إعلم أيّها العزيز!

جنابِ حقّڭ ويرديگى نعمتلرى سويله‌يوب إعلان و تحديثِ نعمت ايتمك، بعضًا غروره و كبره إنجرار ايدر. تواضع قصديله ده او نعمتلرى كتم ايتمك ايى دگلدر. بناءً عليه إفراط و تفريطدن قورتولمق ايچون إستقامت ميزاننه مراجعت ايديلمه‌لى. شويله كه:

هر بر نعمتڭ ايكى وجهى واردر. بر وجهى إنسانه عائددر كه إنسانى تزيين ايدر، مدارِ لذّتى اولور. خلق ايچنده تمايزه‌ سبب اولور. موجبِ فخر اولور، سرخوش اولور. مالكِ حقيقىيى اونوتور. النهاية كبر و غرور قويوسنه دوشورتور.