و كذا إنسان فعل و سعيى جهتيله ضعيف بر حيوان اولوب دائرهٔ سعيى پك طاردر. إنفعال، سؤال، دعا جهتيله رحمٰنِ رحيمڭ عزيز بر مسافريدر. دائره‌سى خيال قدر گنيشدر.

و كذا إنسانڭ حياتِ حيوانيه‌دن آلديغى لذّت بر سرچه قوشنڭ لذّتى قدر دگلدر. چونكه إنسانده حزن، كدر، قورقو وار، اونده يوقدر. فقط جهازات، حسّيات، طويغولر، إستعدادلر إعتباريله حيوانلرڭ أڭ أعلاسندن فضله لذّت آلير. إنسانڭ شو وضعيتنه دقّت ايديليرسه آڭلاشيلير كه: بو قدر جهازات، بو حيات ايچون اولمايوب، آنجق بر حياتِ باقيه ايچون كنديسنه ويريلمشدر.

و كذا إنسان سلطنتِ ربوبيتڭ محاسننه ناظر و أسماءِ قدسيه‌نڭ جلوه‌لرينه دلاّل و قلمِ قدرتله يازيلان مكتوباتِ إلٰهيه‌يى مطالعه ايله متفكّر اولديغى جهتله، أشرفِ مخلوقات و خليفهٔ أرض اولمشدر.

٭ ٭ ٭

﴿يَا اَيُّهَا النَّاسُ اَنْتُمُ الْفُقَرَاءُ اِلَى اللّٰه﴾

إعلم أيّها العزيز!

إنسانده‌كى قصور صوڭسز اولديغى گبى، عجز، فقر و إحتياجنه ده نهايت يوقدر. إنسانه توديع ايديلن آجلق ايله نعمتلرڭ لذّتلرى تبارز ايتديگى گبى· إنسانده‌كى قصور، كمالاتِ سبحانيه درجه‌لرينه بر مرصاددر. إنسانده‌كى فقر، غناءِ رحمتڭ درجه‌لرينه بر مقياسدر. إنسانده‌كى عجز، قدرت و كبرياسنه بر ميزاندر. إنسانده‌كى تنوّعِ حاجات، أنواعِ نِعَم و إحساناتنه بر نردباندر. اويله ايسه فطرتڭدن غايه عبوديتدر. عبوديت ايسه، درگاهِ عزّتنه قصورلريڭى "اَسْتَغْفِرُ اللّٰه" و "سبحان اللّٰه" ايله إعلان ايتمكدر.

٭ ٭ ٭