و كذا صاغ يانمزده فقر ياره‌سى، صولده ده عجز، ضعف جريحه‌سى واردر. أگر قرآنڭ علاجلريله تداوى ايدرسه‌ڭ، فقريمز رحمتِ رحمانڭ ضيافتنه شوق و إشتياقه إنقلاب ايده‌جكدر. عجز و ضعفمز ده قديرِ مطلقڭ درگاهِ عزّتنه إلتجا ايچون بر دعوت تذكره‌سى گبى اولور.

و كذا بزلر اوزون بر سفرده‌يز. بورادن قبره، قبردن حشره، حشردن أبد مملكتنه گيتمك اوزره‌يز. او يوللرده ظلماتى طاغيده‌جق بر نور و بر أرزاق لازمدر. گوونديگمز عقل و علمدن اُميد يوق. آنجق قرآنڭ گونشندن، رحمانڭ خزينه‌سندن تدارك ايديله‌بيلير. أگر بزلرى بو سفردن گرى بيراقه‌جق بر چاره‌ڭز وارسه، پك اعلا. و إلاّ سكوت ايديڭز، قرآنى ديڭله‌يه‌لم باقالم نه أمر ايدييور:

﴿فَلَا تَغُرَّنَّكُمُ الْحَيٰوةُ الدُّنْيَا وَلَا يَغُرَّنَّكُمْ بِاللّٰه الْغَرُورُ﴾

خلاصه: آييق اولان سڭا تابع اولماز. آنجق سياست شرابيله ويا شهرت حرصيله ويا رقّتِ جنسيه ايله ويا فلسفه‌نڭ ضلالتيله ويا مدنيتڭ سفاهتيله سرخوش اولانلر سنڭ مشرب و مسلگڭه تابع اولورلر. فقط إنسانڭ باشنه اينديريلن ضربه‌لر و يوزينه ووريلان طوقاتلر، اونڭ سرخوشلغنى إزاله ايله آييلته‌جقدر.

و كذا إنسان حيوان گبى يالڭز زمانِ حال ايله مبتلا و مشغول دگلدر. بلكه مستقبلڭ قورقوسى و ماضينڭ حزن و كدرى ايله حال ألملرينه معروضدر. فقط كنديسنى شقى، ضالّ، أحمقلردن عدّ ايتمه‌ين آدم، قرآنڭ شو بشارتنى ديڭله‌سين:

﴿اَلَا اِنَّ اَوْلِيَاءَ اللّٰه لَا خَوْفٌ عَلَيْهِمْ وَلَا هُمْ يَحْزَنُونَ ٭ اَلَّذِينَ اٰمَنُوا وَ كَانُوا يَتَّقُونَ ٭ لَهُمُ الْبُشْرٰى فِى الْحَيٰوةِ الدُّنْيَا وَ فِى اْلاٰخِرَةِ لَا تَبْدِيلَ لِكَلِمَاتِ اللّٰه ذٰلِكَ هُوَ الْفَوْزُ الْعَظِيمُ﴾

٭ ٭ ٭