إعلم أيّها العزيز!

سنڭ اوڭڭده چوق قورقونج بيوك مسئله‌لر واردر كه، إنسانى إحتياطه، إهتمامه مجبور ايدر.

بريسى:

ئولومدر كه، إنسانى دنيادن و بتون سَوْگيليلرندن آييران بر آيريلمقدر.

ايكنجيسى:

دهشتلى قورقولى أبد مملكتنه يولجيلقدر.

اوچنجيسى:

عمر آز، سفر اوزون، يول تداركى يوق، قوّت و قدرت يوق، عجزِ مطلق گبى أليم ألملره معروض قالمقدر. اويله ايسه، بو غفلت و نسيان نه‌در؟ دوه‌قوشى گبى باشڭى نسيان قومنه صوقار، گوزيڭه غفلت گوزلگنى طاقارسڭ كه اللّٰه سنى گورمه‌سين. ويا سن اونى گورميه‌سڭ. نه وقته قدر زائلاتِ فانيه‌يه إهتمام و باقياتِ دائمه‌دن تغافل ايده‌جكسڭ؟

إعلم أيّها العزيز!

جنابِ حقّه حمدلر، شكرلر اولسون كه· مسائلِ نحويه‌دن "إسم" ايله "حرف" آراسنده‌كى معنوى فرق ايله چوق مهمّ مسئله‌لرى بڭا اوگرتمشدر. شويله كه:

حرف، غيرڭ معناسنى ايضاح ايچون بر آلَت، بر خادم اولديغى گبى· شو موجودات ده، أسماءِ حسنىنڭ تجلّياتنى إظهار، إفهام، ايضاح ايچون بر طاقم إلٰهى مكتوبلردر كه، ايچلرنده يازيلى دلائل، براهين، خوارق معجزهِٔ قدرتدر. موجودات بو وجهله نظره آلينمه‌سى· علم، ايمان، حكمتدر. شايد إسم گبى مستقل و مقصودِ بِالذّات جهتيله باقيليرسه، كفران و جهلِ مركّب اولور.

و كذا مسائلِ منطقيه‌دن "كلّى" ايله "كلّ" آراسنده‌كى فرق ايله، ربوبيته دائر چوق مسئله‌لرى اوگرنمش بولونويورم. جمال ايله أحديت

﴿كُلِّىٌّ ذُو جُزْئِيَّاتٍ﴾

شمولنه داخلدر. جلال و واحديت

﴿كُلٌّ ذُو اَجْزَاءٍ﴾

عنواننه داخلدر.