دردنجى باصامق:

جنابِ حقّڭ إقتضالرى، حكملرى متغاير بعض أسمالرى واردر. مثلا: بدر گبى بعض غزالرده أصحابِ كرامه يارديم ايتمك اوزره كفّار ايله محاربه ايتمك ايچون ملائكه‌نڭ سمادن إنزالنى إقتضا ايدن إسمى، ملائكه ايله شياطين (يعنى سماوى اولان أخيار ايله أرضى أشرار) آراسنده محاربه‌نڭ وقوعنى إستبعاد دگل، إقتضا ايدر. أوت جنابِ حق ملائكه‌يه بيلديرمكسزين شيطانلرى دفع ويا إهلاك ايده‌بيلير. فقط سطوت و حشمتنڭ إقتضاسى اوزرينه بو قبيل مجازاتڭ مستحقلرينه إعلان و تشهيرى، عظمتنه لايقدر.

بشنجى باصامق:

روحانيلرڭ أخيارى، سماده بولوندقلرندن، أشرارى ده لطافتلرينه گووه‌نه‌رك اونلرى تقليدًا إلتحاق ايتمك ايستدكلرنده، أهلِ سما، اونلرى شرارتلرى ايچون قبول ايتميه‌رك دفع ايدييورلر. مع هذا، بو گبى معنوى مبارزه‌لرى عالمِ شهادته، بِالخاصّه وظيفه‌سى شهادت و مشاهده اولان إنسانه إعلان و تشهيرينه رجمِ نجوم علامت و نشان قيلنمشدر.

آلتنجى باصامق:

قرآنِ معجز البيان، نوعِ بشرى إطاعته إرشاد، عصياندن زجر و منع ايتمك اوزره قوللانديغى اُسلوبِ عاليسنه باق:

﴿يَا مَعْشَرَ الْجِنِّ وَ اْلاِنْسِ اِنِ اسْتَطَعْتُمْ اَنْ تَنْفُذُوا مِنْ اَقْطَارِ السَّمٰوَاتِ وَ الْاَرْضِ فَانْفُذُوا لَا تَنْفُذُونَ اِلَّا بِسُلْطَانٍ﴾

يعنى: "أى إنس و جنّ جماعتى! ملكمدن خارج بر مملكته چيقوب قورتولمق ايچون سماوات و أرضڭ أقطارندن چيقمغه قوّتڭز وارسه چيقيڭز. امّا آنجق بر سلطانله چيقارسڭز."