اون ايكنجى نوطه:

أى بو نوطه‌لرى ديڭله‌ين دوستلرم! بيليڭز كه· بن خلافِ عادت اولارق، گيزلمه‌سى لازم گلن ربّمه قارشى قلبمڭ تضرّع و نياز و مناجاتنى بعضًا يازديغمڭ سببى· ئولوم، ديلمى صوصديرديغى زمانلرده، ديلمه بدل كتابمڭ سويله‌مه‌سنڭ قبولنى رحمتِ إلٰهيه‌دن رجا ايتمكدر.

أوت قيصه بر عمرده، حدسز گناهلريمه كفّارت اولاجق، موقّت لسانمڭ توبه و ندامتلرى كافى گلمييور. ثابت و بر درجه دائم اولان كتابمڭ لسانى داها زياده او ايشه يارار. ايشته بو نوطه‌لرڭ تأليفندن اون اوچ سنه أوّل، دغدغه‌لى بر فورطنهِٔ روحيه نتيجه‌سنده، أسكى سعيدڭ گولمه‌لرى، يڭى سعيدڭ آغلامالرينه إنقلاب ايده‌جگى هنگامده· گنجلگڭ غفلت اويقوسندن إختيارلق صباحيله اويانديغم بر آنده، شو مناجات و نياز عربى يازيلمشدر. بر قسمنڭ توركجه مئالى شودر كه:

أى ربِّ رحيمم و أى خالقِ كريمم! بنم سوءِ إختيارمله عمرم و گنجلگم ضايع اولوب گيتدى. و او عمر و گنجلگڭ ميوه‌لرندن أليمده قالان، ألم ويريجى گناهلر، ذلّت ويريجى ألملر، ضلالت ويريجى وسوسه‌لر قالمشدر. و بو آغير يوك و خسته‌لقلى قلب و خجالتلى يوزمله قبره ياقينلاشييورم. بِالمشاهده گوره گوره، غايت سرعتله، صاغه و صوله إنحراف ايتميه‌رك، إختيارسز بر طرزده، وفات ايدن أحباب و أقران و أقاربم گبى قبر قپوسنه ياناشييورم. او قبر، بو دارِ فانيدن فراقِ أبدى ايله أبد الآباد يولنده قورولمش، آچيلمش أوّلكى منزل و برنجى قپودر. و بو باغلانديغم و مفتون اولديغم شو دارِ دنيايى، قطعى بر يقين ايله آڭلادم كه· هالكدر گيدر و فانيدر ئولور. و بِالمشاهده ايچنده‌كى موجودات دخى، بربرى آرقه‌سندن قافله قافله گوچوب گيدر، غائب اولور. خصوصًا بنم گبى نفسِ أمّاره‌يى طاشييانلره شو دنيا چوق غدّاردر، مكّاردر. بر لذّت ويرسه، بيڭ ألم طاقار چكديرر. بر اوزوم يديرسه، يوز طوقات وورور.