٣١– إنسان مادّى حياتنده· هر آنده هوايه، هر وقت صويه، هر زمان و هر گون غدايه، هر هفته ضيايه محتاجدر. بونلرڭ تكرّرى حدِّ ذاتنده تكرّر اولمايوب، إحتياجلرڭ تكرّرى ايچوندر. كذالك إنسان حياتِ روحيه‌سى جهتيله قرآنده ذكر ايديلن بتون نوعلره محتاجدر. بعض نوعلره هر آنده محتاجدر. "هُوَ اللّٰه" گبى. چونكه روح بونڭ ايله نَفَس آلييور. بعض نوعلره هر وقت، بعضلرينه هر زمان محتاجدر. ايشته حياتِ قلبيه‌نڭ إحتياجلرينه بناءً قرآن تكرارلر ياپييور. مثلا: "بسم اللّٰه"، هواءِ نسيمى گبى قلبى و روحى تطمين ايتديگندن كثرتِ إحتياجه بناءً قرآنده چوق تكرار ايديلمشدر.

٤١– قصّهٔ موسى گبى بعض حادثاتِ جزئيه‌نڭ تكرارى، او حادثه‌نڭ بيوك بر دستورى تضمّن ايتديگنه إشارتدر.

خلاصه:

قرآن هم ذكردر، هم فكردر، هم حكمتدر، هم علمدر، هم حقيقتدر، هم شريعتدر، هم صدرلره شفا، مؤمنلره هدا و رحمتدر.

إعلم أيّها العزيز!

فطرتِ إنسانيه‌نڭ غريب بر حالى، غفلت زماننده لطائف ايله حواسّڭ حكملرينى، إلتباس ايله بربرينه بڭزه‌تير، تفريق ايده‌مز. مثلا: أل ايله گوزى بربرينه بڭزه‌توب خدمتلرينى و وظيفه‌لرينى تفريق ايده‌مه‌ين بر مجنون، يوكسكده گوزيله گورديگى بر شيئى آلمق ايچون ألنى اوزاتييور. أل گوزڭ قومشوسى اولديغى مناسبتله، اونڭ ياپديغى ايشى، أل ده ياپابيلير ظن ايدر.

كذالك إنسانِ غافل، كندى شخصنه عائد أدنا، جزئى بر تنظيمدن عاجز اولديغى حالده غروريله، خياليله جنابِ حقّڭ أفعالنه تحكّم ايله أل اوزاتييور.

ينه إنسانڭ فطرتنده عجيب بر حال: إنسانڭ أفرادى آراسنده جسمًا و صورةً آيريلق وارسه ده پك آزدر. امّا معنًا و روحًا، آرالرنده ذرّه ايله شمس آراسنده‌كى آيريلق قدر بر آيريلق واردر. فقط سائر حيوانات اويله دگلدر. مثلا باليق ايله قوش، قيمتِ روحيه‌جه بربرينه پك ياقيندرلر. أڭ كوچگى أڭ بيوگى گبيدر. چونكه إنسانڭ قوّهِٔ روحيه‌سى تحديد ايديلمه‌مشدر. أنانيت ايله او قدر آشاغى دوشرلر كه، ذرّه‌يه مساوى اولور. عبوديت ايله ده او قدر يوكسگه چيقييور كه، ايكى جهانڭ گونشى اولور. (حضرتِ محمّد عليه الصلاة والسلام گبى.)