ذيل الحباب

﴿بِسْمِ اللّٰه الرَّحْمٰنِ الرَّحِيمِ﴾

اويله بر اللّٰهه حمد، مدح و ثنالر ايدرز كه، شو عالمِ كبير اونڭ ايجاديدر. و إنسان دينيلن شو كوچك عالم ده اونڭ إبداعيدر. برى إنشاسى، ديگرى بناسيدر. برى صنعتى، ديگرى صبغه‌سيدر. برى نقشى، ديگرى زينتيدر. برى رحمتى، ديگرى نعمتيدر. برى قدرتى، ديگرى حكمتيدر. برى عظمتى، ديگرى ربوبيتيدر. برى مخلوقى، ديگرى مصنوعيدر. برى ملكى، ديگرى مملوكيدر. برى مسجدى، ديگرى عبديدر. أوت بتون بو شيلر، أجزاسيله برابر اللّٰهڭ ملكى و مالى اولديغى، إعجازوارى سكّه و مُهرلريله ثابتدر...

﴿اَللّٰهُمَّ يَا قَيُّومَ الْاَرْضِ وَ السَّمَاءِ اِنَّا نُشْهِدُكَ وَ جَمِيعَ مَصْنُوعَاتِكَ وَ جَمِيعَ خَلْقِكَ بِاَنَّكَ اَنْتَ اللّٰه لَا اِلٰهَ اِلَّا اَنْتَ وَحْدَكَ لَا شَرِيكَ لَكَ وَ نَسْتَغْفِرُكَ وَ نَتُوبُ اِلَيْكَ وَ نَشْهَدُ اَنَّ مُحَمَّدًا عَبْدُكَ وَ رَسُولُكَ اَرْسَلْتَهُ رَحْمَةً لِلْعَالَمِينَ اَللّٰهُمَّ صَلِّ وَ سَلِّمْ عَلَيْهِ كَمَا يُنَاسِبُ حُرْمَتَهُ وَ كَمَا يَلِيقُ بِرَحْمَتِكَ وَ عَلٰى اٰلِهِ وَ صَحْبِهِ اَجْمَعِينَ﴾

إعلم أيّها العزيز!

هر كيم كنديسنى اللّٰهه مال ايدرسه، بتون أشيا اونڭ لهنده اولور. و كيم اللّٰهه مال اولماسه، بتون أشيا اونڭ عليهنده اولور. اللّٰهه مال اولمق ايسه، بتون أشيايى ترك و هر شيئڭ اوندن اولديغنى و اوڭا رجوع ايتديگنى بيلمكله اولور.

إعلم أيّها العزيز!

جنابِ حقّڭ سڭا إنعام ايتديگى وجود ايله وجوده لازم اولان شيلر، تمليك صورتيله دگلدر. يعنى، سنڭ ملكڭ و مالڭ اولوب ايستديگڭ گبى تصرّف ايتمك ايچون ويريلمه‌مشدر. آنجق او گبى نعمتلرده، اللّٰهڭ رضاسنه موافق تصرّف ايديله‌بيلير.