باخصوص بو گروهِ مجاهدين و بو يوكسك مجلسڭ أفعالى تقليد ايديلير. قصورلرينى ملّت يا تقليد ويا تنقيد ايده‌جك· ايكيسى ده ضرردر. ديمك اونلرده حقوق اللّٰه، حقوقِ عبادى ده تضمّن ايدييور. سرِّ تواتر و إجماعى تضمّن ايدن حدسز إخباراتى و دلائلى ديڭله‌مه‌ين و سفسطهِٔ نفس و وسوسهٔ شيطاندن گلن بر وهمى قبول ايدن آدملرله، حقيقى و جدّى ايش گورولمز.

شو إنقلابِ عظيمڭ تمل طاشلرى صاغلام گرك. شو مجلسِ عالينڭ شخصيتِ معنويه‌سى، صاحب اولديغى قوّت جهتيله معناىِ سلطنتى درعهده ايتمشدر. أگر شعائرِ إسلاميه‌يى بِالذّات إمتثال ايتمك و ايتديرمكله معناىِ خلافتى دخى وكالةً درعهده ايتمزسه، حيات ايچون درت شيئه محتاج، فقط عنعنهِٔ مستمرّه ايله گونده لا أقل بش دفعه دينه محتاج اولان، شو فطرتى بوزولميان و لهوياتِ مدنيه ايله إحتياجاتِ روحيه‌سنى اونوتميان بو ملّتڭ حاجاتِ دينيه‌سنى مجلس تطمين ايتمزسه· بِالمجبوريه معناىِ خلافتى، تمامًا قبول ايتديگڭز إسمه و لفظه ويره‌جك. او معنايى إدامه ايتمك ايچون قوّتى دخى ويره‌جك. حالبوكه مجلس ألنده بولونميان و مجلس طريقيله اولميان بويله بر قوّت، إنشقاقِ عصايه سببيت ويره‌جكدر. إنشقاقِ عصا ايسه،

﴿وَ اعْتَصِمُوا بِحَبْلِ اللّٰه جَمِيعًا﴾

آيتنه ضددر. زمان جماعت زمانيدر. جماعتڭ روحى اولان شخصِ معنوى داها متيندر و تنفيذِ أحكامِ شرعيه‌يه داها زياده مقتدردر. خليفهِٔ شخصى، آنجق اوڭا إستناد ايله وظائفى درعهده ايده‌بيلير. جماعتڭ روحى اولان شخصِ معنوى أگر مستقيم اولسه، زياده پارلاق و كامل اولور. أگر فنا اولسه، پك چوق فنا اولور. فردڭ، اييلگى ده فنالغى ده محدوددر. جماعتڭ ايسه غيرِ محدوددر. خارجه قارشى قزانديغڭز اييلگى، داخلده‌كى فنالقله بوزمايڭز. بيليرسڭز كه أبدى دشمنلريڭز و ضدلريڭز و خصملريڭز، إسلامڭ شعائرينى تخريب ايدييورلر. اويله ايسه ضرورى وظيفه‌ڭز، شعائرى إحيا و محافظه ايتمكدر. يوقسه شعورسز اولارق شعورلى دشمنه يارديمدر. شعائرده تهاون، ضعفِ ملّيتى گوسترر. ضعف ايسه دشمنى توقيف ايتمز، تشجيع ايدر...

﴿حَسْبُنَا اللّٰه وَ نِعْمَ الْوَكِيلُ ٭ نِعْمَ الْمَوْلٰى وَ نِعْمَ النَّصِيرُ﴾

٭ ٭ ٭