ايكنجى مسئله:

بن هم كندمده، هم بو ياقينده‌كى رسالهِٔ النور طلبه‌لرنده، شهورِ محرّمه‌دن صوڭره بر يورغونلق و شوقده بر فتور گورويوردم. سببنى واضحًا بيلمييوردم. شيمدى، أسكيده سويله‌ديگم تخمينى سبب، حقيقت اولديغنى گوردم. شويله كه:

ناصل مادّى هوا فنا ايسه، فنا تأثير ايدييور. معنوى هوا ده بوزولسه، هركسڭ إستعدادينه گوره بر صارصينتى ويرر. شهورِ ثلاثه و محرّمه‌ده عالمِ إسلام معنوى هواسى، عموم أهلِ ايمانڭ آخرت قزانجنه و تجارتنه جدّى توجّهلرى و همّتلرى و تنويرلرى او هوايى صافيلشديرييور، گوزللشديرييور. مدهش عارضه‌لره و فورطنه‌لره مقابله ايدييور. هركس او سايه‌ده و سايه‌سنده درجه‌سنه گوره إستفاده ايدر.

فقط او شهورِ مباركه گيتدكدن صوڭره، عادتا او آخرت تجارتنڭ مشهرى و پازارى دگيشديگى گبى· دنيا سرگيسى آچيلمغه باشلايور. أكثر همّتلر، بر درجه وضعيتى دگيشييور. هوايى تسميم ايدن بخاراتِ مزخرفه او معنوى هوايى بوزار. هركس درجه‌سنه گوره اوندن زده‌لنير. بو هوانڭ ضررندن قورتولمق چاره‌سى، رسالهِٔ النورڭ گوزيله باقمق و نه قدر مشكلات زياده‌لشسه قدسى وظيفه إعتباريله داها زياده جدّيت و شوقله حركت ايتمكدر. چونكه باشقه‌لرڭ فتورى و چكيلمه‌سى، أهلِ همّتڭ شوقنى، غيرتنى زياده‌لشديرمگه سببدر. زيرا گيدنلرڭ وظيفه‌لرينى ده بر درجه ياپمغه كندينى مجبور بيلير و بيلمليدرلر.

٭ ٭ ٭