اوچنجيسى:

صبرى قارداش! قيمتدار خلوصينڭ مكتوبى هم خلوصينڭ، هم بشنجى شعاعڭ أهمّيتنى و قيمتلرينى گوسترديگندن چوق بگندم.

أوت بشنجى شعاع، عمومڭ و بِالخاصّه أهلِ علمڭ ايمانلرينى تصحيح ايدوب قورتارييور.

هم سن، هم خسرو، خليل إبراهيمدن بحث ايدييورسڭز. او ذات، رسالهِٔ النورڭ أهمّيتلى بر طلبه‌سى و إقتدارلى بر ناشريدر، هم خاصلردندر. سابق حادثه‌مزدن تام بر إحتياط و جدّى بر علاقه‌دارلق درسنى آلديغى قناعتنده‌يم. سلاممى اوڭا و رفقاسنه تبليغ ايديڭز.

دردنجيسى:

خسرو قارداش! سنڭ مكتوبڭ، بنم مراقلريمه (حسن، مصطفىلر گبى) بر شفا و آرزولريمه بر دوا (معجزاتِ أحمديه گبى) و اميدلريمه بر ضيا (رأفت، قونيالى صبرى گبى) حكمنه گچدى.

هم رسالهِٔ النورڭ محترم بر طلبه‌سى و خاص دائره‌سنده بولنان آخرت همشيره‌م والده‌ڭزڭ خسته‌لغى و إختيارلغى سنى إسپارطه‌يه جلبى خيردر. ألبته سن اوڭا، خسته‌لر و إختيارلر رساله‌لرينى اوقومشسڭ. او رساله‌لر، بنم بدلمه اونڭ كيفنى صوروب تسلّى ويرسينلر.

بن، اوراده‌كى طلبه‌لرى و دوستلرى دعا ايله چوق تخطّر ايدييورم. اونلرى اونوتامييورم. عموم قارداشلريمه برر برر سلام و دعا ايدييورم.

سعيد النورسى

٭ ٭ ٭