مقدّمه

بو آيت ماقبليله برابر قيامته، حشره إشارت ايدر. بناءً عليه بو مسئله‌ده نظره آلينه‌جق درت نقطه واردر:

برنجيسى:

عالمڭ إمكانِ خرابيتيله ئولوميدر. ايكنجيسى: خرابيتڭ وقوعه گلمسيدر. اوچنجيسى: تعمير و إحياسيدر. دردنجيسى: تعميرينڭ إمكانى و وقوعيدر.

أوّلا:

خرابيتِ عالم إمكان دائره‌سنده اولوب اولماديغندن بحث ايده‌جگز. أوت عالمده تكامل قانونى واردر. بو قانونه تابع اولان، نشو و نما قانوننه داخلدر. بو قانونه داخل اولانڭ بر عمرِ طبيعيسى واردر. عمرِ طبيعيسى اولانڭ، أجلِ فطريسى واردر· أجلڭ پنچه‌سندن قورتولاماز. أوت كائناتڭ إحتوا ايتديگى أنواعڭ و بو أنواعڭ إحاطه ايتديگى أفرادڭ قسمِ أكثريسى بو قانونلره تابعدرلر. بناءً عليه عالمِ صغير دينلن إنسان، ئولومدن و خرابيتدن قورتولامديغى گبى· إنسانِ كبير دينلن عالمڭ ده ئولومدن نجاتى يوقدر. و كذا كائناتڭ بر آغاجى ئولومدن، طاغيلمقدن خلاص اولماديغى گبى، شجرهِٔ خلقتدن اولان كائنات سلسله‌سنڭ ده خرابيتدن قورتولوشى يوقدر. أوت أگر كائنات عمرِ فطريسندن أوّل خارجى بر تخريباته ويا صانعى طرفندن بر هدم و قيامته معروض قالماسه بيله، فنّى بر حساب ايله كائناتڭ اويله بر گونى گله‌جكدر كه·

﴿اِذَا السَّمَاءُ انْشَقَّتْ ٭ اِذَا الشَّمْسُ كُوِّرَتْ ٭ اِذَا النُّجُومُ انْكَدَرَتْ﴾

گبى آيتلره ماصدق اولاجقدر و إنسانِ كبير دينلن قوجه كائنات، شو بوشلغى سكراتنڭ باغيرتيلريله طولديره‌جقدر.