طوقوزنجى إشارت:

"حزب اللّٰه اولان أهلِ هدايت، باشده أنبيا و اونلرڭ باشنده فخرِ عالم صلّى اللّٰه تعالى عليه وسلّم، او قدر عناياتِ إلٰهيه‌يه و إمداداتِ سبحانيه‌يه مظهر اولدقلرى حالده، نه‌دن حزب الشيطانه قارشى بعضًا مغلوب اولمشلر. هم خاتم الأنبيانڭ گونش گبى پارلاق نبوّتى و رسالتنڭ قومشولغنده بولونان مدينه منافقلرينڭ ضلالتده إصرارلرى و هدايته گيرمه‌ملرى نه ايچوندر و حكمتى نه‌در؟" دييه سؤاله قارشى هركسى علاقه‌دار ايده‌جك گوزل و قوّتلى بر جوابدر.

اوننجى إشارت:

إبليسڭ كندينى كندينه تابع اولانلره إنكار ايتديرمك صورتنده‌كى دسيسه ماسكه‌سنى ييرته‌رق، (إبليسڭ) پيس و ملوّث يوزينى گوستروب، وجودينى إثبات ايدر.

اون برنجى إشارت:

أهلِ ضلالتڭ شرّندن كائنات قيزدقلرينى و عناصرِ كلّيه حدّت ايتدكلرينى و عموم موجودات معنًا غليانه گلدكلرينى، قرآنِ حكيم معجزانه إفاده ايتديگنه دائر مراقآور بر بياندر.

اون ايكنجى إشارت:

درت سؤال و جوابدر. "محدود بر حياتده محدود گناهلره مقابل حدسز بر عذاب و نهايتسز بر جهنّم ناصل عدالت اولور؟" هم "شريعتده دينيلمشدر كه: جهنّم، جزاىِ عملدر· فقط جنّت، فضلِ إلٰهى ايله‌در. بونڭ حكمتى نه‌در؟" هم "سيّئات إنتشار و تجاوز ايتديگندن، بر سيّئه بيڭ يازيلمق، حسنه بر يازيلمق لازم گليركن· سيّئه‌نڭ بر، حسنه‌نڭ اون يازيلماسنڭ سرّى نه‌در؟" هم "أهلِ ضلالتڭ قزاندقلرى موفّقيت و گوستردكلرى قوّت، أهلِ هدايتده بر ضعف و حقيقتسزلك اولديغندن ميدر؟" دييه درت سؤاله غايت قيصه و قوّتلى درت جوابدر.