دردنجى جهت: إستدراجه مظهر اولان دجّالڭ بتون بتون منكِر اولديغنى و بو إنكارِ مطلقدن چيقان بر جرئت و جسارتله مقدّساته هجوم ايده‌جگنى و ياپاجغى تخريباتڭ فوق العاده بر إقتدار و بر دها أثرى ظن ايديله‌جگنى إخبار ايدوب، قهرمان و مجاهد بر اوردونڭ و ديندار ملّتڭ روحنده‌كى نورِ ايمان و مشعلهِٔ قرآنله حقيقتِ حالى گوره‌جگنى و او چوق دهشتلى تخريباتى تعميره چاليشه‌جغنى تبشير ايدر.

اوچنجى مسئله مدارِ عبرت اوچ حادثه‌در:

برنجيسى: حضرتِ عُمَر رضى اللّٰه عنهڭ دجّالڭ صورتنه قارشى گوسترديگى حدّت و عداوته مقابل، دجّالڭ حضرتِ عُمَرى (رضى اللّٰه عنه) ثناكارانه مدح ايتمه‌سيدر.

ايكنجيسى: إسلام دجّالى كنديسيله علاقه‌دار ظن ايتديگى و ايچريسنده

﴿لَقَدْ خَلَقْنَا اْلاِنْسَانَ فِى اَحْسَنِ تَقْوِيمٍ﴾

آيتى بولونماسندن

﴿وَالتِّينِ وَالزَّيْتُونِ﴾

سوره‌سنڭ معناسنى تكرار تكرار صوره‌جغنى، حالبوكه بو سوره‌نڭ قومشوسى اولان

﴿اِقْرَاْ﴾

سوره‌سنده

﴿اِنَّ اْلاِنْسَانَ لَيَطْغٰى﴾

جمله‌سى معناسيله او دجّالڭ حركاتنه و جفرى مقاميله او دجّالڭ تام تاريخنه باقديغنى و إنسان إسمِ عموميسيله ده شخصندن خبر ويرديگنى إخبار ايتمه‌سيدر.

اوچنجى حادثه: إسلام دجّالى خُراسان طرفلرندن ظهور ايده‌جك دينيلمش. بو روايت تفسير ايله آڭلاشيلمقله برابر، هم بو روايت زماننده توركلرڭ وطنى خُراسان اولديغنى خبر ويرر، هم ده مدارِ شكران بر كرامتى إخبار ايدر كه: او إسلام دجّالى إسلاميتڭ بر قسم شعائرينه قارشى يدى يوز سنه مدّت ظرفنده إسلاميتڭ و قرآنڭ ألنده شرفشعار، بارقه‌آسا بر ألماس قلنج اولان تورك ملّتنى و توركجيلگى موقّةً إستعمال ايده‌جگنى و فقط تام موفّق اولاميه‌رق گرى چكيله‌جگنى و قهرمان اوردو ديزگينلرينى اونڭ ألندن قورتاره‌جغنى روايتلر خبر ويرييور دير، بشارت ويرر.