ايكنجيسى: ماهيتِ محمّديه (عصم) عالمِ إسلاميتڭ شجرهِٔ كبراسنڭ منشئى، چكردگى، حياتى، مدارى اولديغندن، فوق الحدّ إستعداد و جهازاتيله عالمِ إسلاميتڭ معنوياتنى تشكيل ايدن قدسى كلماتى، تسبيحاتى، عباداتى أڭ أوّل بتون معنالريله حسّ ايدوب ياپماسندن گلن ترقّياتِ روحيه‌سنى دوشونديروب، حبيبيت درجه‌سنه چيقان عبوديتِ محمّديه‌نڭ (عصم) ولايتى، سائر ولايتلردن نه قدر يوكسك اولديغنى آڭلاتير. او ذاتڭ (عصم) حدّ و نهايتى اولميان مراتبِ كمالاتده نه درجه ترقّى ايتديگنى بيلديرر.

اوچنجيسى: ذاتِ فردِ ذو الجمال بتون نوعِ بشر نامنه، بلكه عموم كائنات حسابنه ذاتِ محمّديه عليه الصلاة والسلامى كندينه مخاطب إتّخاذ ايتمكله· ألبته اونى حدسز كمالاتده حدسز فيضنه مظهر ايتديگنى و شخصيتِ معنويهِٔ محمّديه عليه الصلاة والسلام، كائناتڭ معنوى بر گونشى و بو كائنات دينيلن قرآنِ كبيرڭ آيتِ كبراسى و او فرقانِ أعظمڭ و إسمِ أعظمڭ و إسمِ فردڭ جلوهِٔ أعظمنڭ بر آيينه‌سى اولديغنى درس ويرر.

بشنجى نكته

﴿ فَانْظُرْ اِلٰى اٰثَارِ رَحْمَتِ اللّٰهِ كَيْفَ يُحْيِى الْاَرْضَ بَعْدَ مَوْتِهَا اِنَّ ذٰلِكَ لَمُحْيِى الْمَوْتٰى وَهُوَ عَلٰى كُلِّ شَيْءٍ قَدِيرٌ﴾

آيتِ عظيمه‌سيله

﴿اَللّٰهُ لَا اِلٰهَ اِلَّا هُوَ الْحَىُّ الْقَيُّومُ لَا تَاْخُذُهُ سِنَةٌ وَلَا نَوْمٌ﴾

آيتِ عظيمنڭ بر نكته‌سى و "حىّ" إسمِ أعظمنڭ بر جلوه‌سى اولوب، مختصرًا "بش رمز" ايچنده گوستريلمشدر.