اوچنجى نقطه:

صانعِ قدير، إسمِ حَكم و حكيميله، كائناتده أڭ زياده حكمتلره مدار و مظهر قيلديغى إنسانى· بر مركز، بر مدار حكمنده ياراتمش. و إنسان دائره‌سى ايچنده ده رزقى بر مركز حكمنه گتيرمش. إنسانده شعور و رزقده ذوق واسطه‌سيله إسمِ حَكمڭ پارلاق بر صورتده جلوه‌سنڭ گورونديگنى· و يوزر فنلردن هر بر فنّڭ بر جهتده إسمِ حَكمڭ جلوه‌سنى تعريف ايتديگنى· (مثلا فنِّ طب، فنِّ كيميا، فنِّ زراعت، فنِّ تجارت و هكذا...) بو فنلرڭ هر بريسنڭ قطعى شهادتلريله، إختيار و إراده، قصد و مشيئتى گوسترن بو حدسز إنتظامات و حكمتلرى او صانعِ حكيم عموم كائناته ويرديگى گبى، أڭ كوچك بر ذىحياتده و أڭ كوچك بر چكردكده دخى درج ايتمسيله، ذاتِ أقدسنڭ فاعلِ مختار اولديغنى· و هر شى اونڭ أمريله وجود بولديغنى· و اونى بيلمه‌مك و طانيمه‌مق نه قدر عجيب بر جهالت و ديوانه‌لك اولديغنى ايضاح ايدييور.

دردنجى نقطه:

صانعِ حكيم، هر بر موجودينه طاقديغى يوزلر حكمتى، او موجودلرڭ نهايت حسّاسيتيله توظيف ايتديگى يوزلر وظيفه‌لرندن پك چوق فائده و غايه‌لرى نهايت دقّت ايله تعقيب ايتديگى حالده، اونڭ جمالِ رحمت و كمالِ عدالتنه و نهايت درجه‌ده حكمتنه ضد اولان· و رحمت و عدالتنى إنكار ايتديرن حشرسزلگه هيچ بر جهتله مساعده ايتمديگنى بيان ايدييور.

بشنجى نقطه:

"ايكى مسئله"در.

برنجى مسئله:

فطرتده إسراف و عبثيت و فائده‌سزلك بولونماديغندن،

﴿كُلُوا وَ اشْرَبُوا وَ لَا تُسْرِفُوا﴾

آيتِ كريمه‌سيله، إقتصادسز حركت ايدنلرى تهديد ايدر.