اوچنجى نقطه:

بو راديو ماكينه‌جگنده و معنوى كلمات چيچكلرينه صاقسيلق ايدن بو قابجقده‌كى بر آووج هوانڭ گوستردكلرى معجزاتِ قدرتدن بو حقيقت آڭلاشيلييور كه: هر بر ذرّه جنابِ حقّى ذاتيله و صفاتيله تعريف ايدر و إثبات ايدر. بتون كائناتى تفتيش ايدن حكمالر و علمالر بيوك و گنيش دليللرله، ذاتِ واجب الوجودڭ وجودينى و وحدتنى إثبات ايتمك ايچون بتون كائناتى نظره آليرلر. صوڭره معرفت اللّٰهى تام ألده ايدييورلر. حالبوكه ناصل گونش چيقديغى وقت بر ذرّه‌جك جام، عين دڭز يوزى گبى گونشى گوسترييور و او گونشه إشارت ايدييور. اويله ده، بو بر آووج هواده‌كى هر بر ذرّه ده مذكور حقيقته بناءً عينًا كائنات دڭزنده‌كى جلوهِٔ توحيدى، صفاتِ كماليله كنديلرنده گوسترييورلر.