ايكنجى سبب:

رسالهِٔ نورڭ مهمّ بر وظيفه‌سى، عالمِ إسلامڭ أكثريتِ مطلقه‌سنڭ يازيسى و خطّى اولان حروفِ عربيه‌يى محافظه ايتمك اولديغندن، طبع يوليله ايشه گيريشلسه· شيمدى أكثر خلق يالڭز يڭى حروفى بيلدكلرى ايچون، أڭ چوق رساله‌لرى يڭى حروفله طبع ايتمك لازم گله‌جك. بو ايسه رسالهِٔ نورڭ يڭى حروفه بر فتواسى اولوب، شاكردلرى ده او قولاى يازىيى ترجيح ايتمگه سبب اولور. اونڭ ايچون شيمدىيه قدر پك چوق مستحق و لايق ايكن، رسالهِٔ نوره سربستيت ويريلمه‌مشدى. ِللّٰه الحمد شيمدى حقيقتلرينڭ قوّتيله سربستيتى قزاندى. حتّى أسكى حرفله طبع ياساق ايكن، آيت الكبرايى بزه تسليم ايتديروب، بر كرامتِ أكبر گوستردى.

بز شيمدى غايت مهمّ و هركسه لازم ميوه ايله حجّة اللّٰه البالغه‌يى ايكيسى بر جلد اولارق يڭى حروفله طبع ايتمك ايچون طاهرى ايله إستانبوله گوندردم. يالڭز ميوه‌نڭ اوننجى و اون برنجى مسئله‌لرينى وقت بولامايوب تصحيحسز اوڭا ويردم. شايد طبع ايديلسه، او ايكى مسئله‌يى تام تصحيح ايدوب اوڭا گوندررسڭز.

هم او ايكى رساله· داخلده، يا خارجده، آشكاره ويا گيزلى، إستانبولده ويا طيشاريده أسكى حرفلرله طبع ايتمك لازمدر.

هم معجزاتِ قرآنيه ذيللريله و معجزاتِ أحمديه (عصم) دخى ذيللريله برابر ايكيسى بر جلد ايچنده أسكى حرفلرله إمكان دائره‌سنده يا إستانبول ويا باشقه يرده أسكى حرفلرله، توافقلى حزب النوريه، حزب القرآن گبى طبع ايتمه‌سنه چاليشمق لازمدر كه· قرآنِ معجز البيانڭ گوزه گورونن توافق معجزه‌سنڭ محافظه ايله طبع ايديلمه‌سنه مقدّمه اولسون. فقط تأنّى ايله، مشورت ايله، إحتياط ايله بو قدسى مسئله‌يه چاليشمق لازمدر.