(صبرينڭ بر فقره‌سيدر)

أيّها الاستاد المحترم!

بِالإستنساخ تقديمِ حضورِ فاضلانه‌لرى قيلينان يگرمى سكزنجى مكتوبڭ يدنجى مسئله‌سى تام زماننده إظهارِ أندام ايتمشدر. شو مبارك أثر رسالات النور و مكتوبات النورڭ بر نوع تاريخچه‌لرى اولديغى گبى، ديگر جهتدن ده آثارِ پرأنوارڭ سندات و براهينِ قطعيه‌لرى حكمنده گورولمكله برابر، اوچ سنه‌دن بَرى دماغمده محسوس و محفوظ بر چوق إحتساساتى ده، بو كرّه ظاهره چيقارمشدر. ايشته قرآنِ عظيم الشانڭ درجهِٔ قدسيت و علويت و نورانيتى بويله ألماس و مجوهراتِ معنويه‌يى جامع بولونديغى، بو مسئله و أمثالى مسائلدن آڭلاشيلمشدر.

أوت شو حقيقتى ده إعتراف ايتمك لازم كه، بر مجوهرات خزينه‌سى نه قدر زنگين و نه قدر يوكسك بر ثروته مالك اولورسه اولسون· بايعى، دلاّلى، اصولِ بيع و شرايه آشنا اولمازسه، ذى اليد بولونديغى قيمتدار خزينه‌نڭ مشتمل و محتوى بولونديغى أمتعه‌يى، لايقيله عالمه إعلان و أنظارِ عامّه‌يه وضع ايده‌مز. بناءً عليه شو دورِ مشوّشده، حقائقِ قرآنيه‌نڭ حقّيله بيع و شراسنى ياپان دلاّلِ قرآنڭ دگل آلتى سنه‌در، بلكه قرق سنه‌دن بَرى أهلِ إسلامه خطابًا:

﴿يَا اَيُّهَا الَّذِينَ اٰمَنُوا هَلْ اَدُلُّكُمْ عَلٰى تِجَارَةٍ تُنْجِيكُمْ مِنْ عَذَابٍ اَلِيمٍ﴾

فرمانِ ربّانيسيله ندا ايتمه‌لرى، بِالعموم أنوارِ ايمانيه‌يه محتاج اُمّتِ محمّدى مديونِ شكران أيله‌مش و أيله‌مكده‌در.

صبرى

٭ ٭ ٭

(صبرينڭ فقره‌سى)

أيّها الاستاد المحترم!

بو كرّه يگرمى يدنجى مكتوبڭ ايكنجى ذيلنى، يگرمى سكزنجى مكتوبڭ بشنجى، آلتنجى مسئله‌لرينى بِالإستنساخ أصل مع صورت تقديم ايدييورم. بنده‌لرى يگرمى يدنجى مكتوبڭ تأليف و تأسيس و ترتيبنده، چوق مهمّ بر إصابت حسّ ايدييورم كه، بو مكتوبڭ تأليفنده‌كى غايه، قطعيًا مكتوب صاحبلرينى إعلان و تشهير اولماديغى، بلكه مختلف الدرجات ذوى الأفكار و ألبابڭ هر برى، نورلرڭ آنجق يوزده برر خاصّه‌لرينى و فوائدينى گوره‌رك، دلاّلِ قرآنڭ بر درجه‌يه قدر ندالرينى تقليده چاليشمه‌لرى، آيريجه بر ذوق و لطافت إحساس ايدييور.