بو مقام يازيلديغى زمان قربان بايرامى گلدى.

"اللّٰه أكبر" "اللّٰه أكبر" "اللّٰه أكبر"لر ايله نوعِ بشرڭ بشدن بريسنه، اوچ يوز ميليون إنسانلره بردن "اللّٰه أكبر" ديديرمه‌سى· قوجه كُرهِٔ أرض، بيوكلگى نسبتنده او "اللّٰه أكبر" كلمهِٔ قدسيه‌سنى سماواتده‌كى سيّارات آرقداشلرينه ايشيتديرييور گبى، يگرمى بيڭدن زياده حاجيلرڭ عرفاتده و عيدده برابر بردن "اللّٰه أكبر" ديمه‌لرى، رسولِ أكرم عليه الصلاة والسلامڭ بيڭ اوچيوز سنه أوّل آل و صحابه‌لريله سويله‌ديگى و أمر ايتديگى "اللّٰه أكبر" كلامنڭ بر نوع عكسِ صداسى اولارق ربوبيتِ إلٰهيه‌نڭ "ربّ الأرض و ربّ العالمين" عظمتِ عنوانيله كلّى تجلّيسنه قارشى گنيش و كلّى بر عبوديتله بر مقابله‌در، دييه تخيّل و حسّ و قناعت ايتدم.

صوڭره، عجبا بو كلامِ قدسينڭ بزم مسئله‌مزله دخى مناسبتى وار مى دييه تخطّر ايتدم. بردن خاطره گلدى كه، باشده بو كلام اولارق سائر باقياتِ صالحات عنواننى طاشييان "سبحان اللّٰه" و "الحمد ِللّٰه" و "لَا اِلٰهَ اِلَّا اللّٰه" گبى شعائردن چوق كلاملر، جزئى و كلّى مسئله‌مزى إخطار و تحقّقنه إشارت ايدرلر. مثلا "اللّٰه أكبر"ڭ بر وجهِ معناسى، جنابِ حقّڭ قدرتى و علمى هر شيئڭ فوقنده بيوكدر، هيچ بر شى دائرهِٔ علمندن چيقاماز، تصرّفِ قدرتندن قاچاماز و قورتولاماز. و قورقديغمز أڭ بيوك شيلردن داها بيوكدر. ديمك حشرى گتيرمكدن و بزى عدمدن قورتارمقدن و سعادتِ أبديه‌يى ويرمكدن داها بيوكدر. هر عجيب و طورِ عقلڭ خارجنده‌كى هر شيدن داها بيوكدر كه،

﴿مَا خَلْقُكُمْ وَلَا بَعْثُكُمْ اِلَّا كَنَفْسٍ وَاحِدَةٍ﴾

آيتنڭ صراحتِ قطعيه‌سيله نوعِ بشرڭ حشرى و نشرى، بر تك نفسڭ ايجادى قدر او قدرته قولاى گلير. بو معنا إعتباريله‌در كه، ضربِ مَثل حكمنده بيوك مصيبتلره و بيوك مقصدلره قارشى، هركس "اللّٰه بيوكدر، اللّٰه بيوكدر" دير.. كندينه تسلّى و قوّت و نقطهِٔ إستناد ياپار.