باق كتابِ كائناتڭ صفحهِٔ رنگيننه

امهِٔ ذرّينِ قدرت، گور نه تصوير أيله‌مش.

قالمامش بر نقطهِٔ مظلم، چشمِ دل أربابنه

صانكه آياتن خدا، نور ايله تحرير أيله‌مش.

باق، نه معجزِ حكمت، إذعانرباىِ كائنات·

باق، نه عالى بر تماشادر فضاىِ كائنات·

ديڭله ده ييلديزلرى، شو خطبهِٔ شيريننه،

نامهِٔ نورينِ حكمت، باق نه تقرير أيله‌مش.

هپ برابر نطقه گلمش، حق لسانيله ديرلر:

بر قديرِ ذو الجلالڭ حشمتِ سلطاننه

برر برهانِ نورأفشانز وجوبِ صانعه، هم وحدته، هم قدرته شاهدلرز بز.

شو زمينڭ يوزينى يالديزلايان نازنين معجزاتى چون مَلك سيراننه

بو سمانڭ أرضه باقان، جنّته دقّت ايدن، بيڭلر مدقّق گوزلرز بز.

طوباىِ خلقتدن سماوات شقّنه، هپ كهكشان أغصاننه

بر جميلِ ذو الجلالڭ دستِ حكمتيله طاقيلمش، بيڭلر گوزل ميوه‌لرز بز.

شو سماوات أهلنه برر مسجدِ سيّار، برر خانهِٔ دوّار، برر علوى آشيانه،

برر مصباحِ نوّار، برر گمىِ جبّار، برر طيّاره‌يز بز.